Gobernador St.Maarten a aktua konforme su outoridat konstitushonal i legal

PHILIPSBURG – Den e disputa ku a surgi entre promé minister di St.Maarten Luc Mercelina i e gobernador Ajamu Baly tin un opinion legal di e profeshonal legal Dr. Rycond Santos do
Nascimento. E profeshonal legal ta yega na e konklushon ku gobernador Baly a aktua dentro di su outoridat konstitushonal i legal den e kaso di yanüari 2026 relashoná ku e Hefe di Personal na Ministerio di VSA.

E opinion ta bisa tambe ku, ounke ku e promé minister (Minister di Asuntunan General) por a
tuma un medida inisial, e poder pa suspendé e funshonario tabata pertenesé na e gobernador i no na e promé minister su so. E opinion legal ta fecha 30 di mart 2026, prepará na Willemstad ,i ta relashoná ku e diskushon públiko i legal ku a surgi despues di un konseho anterior di Prof. dr. Van Rijn tokante e ròl di e gobernador. Den e introdukshon di e dokumento, Santos do Nascimento ta indiká ku e konseho anterior tabata basá riba informashon inkompleto i un interpretashon legal ku, segun e, no a reflehá korektamente e posishon konstitushonal di e gobernador den e sistema legal di St. Maarten i den e Reino Hulandes.