PORT ÒF SPAIN, Trinidad & Tobago— CANTO, e asosashon prinsipal di telekomunikashon i ICT den Karibe, a anunsiá ku su siguiente evento grandi kua ta “41st Annual Conference and Trade Exhibition”. E lo tuma lugá di 9 pa 12 di ougùstùs 2026 den Hard Rock Hotel & Casino na Punta Cana, Repúblika Dominikana. E tema lo ta; “Elevate the Caribbean: From connectivity to global competitiveness.” E konferensha ta enfoká riba fortifiká e ekonomia digital di Karibe i yud’é bira mas kompetitivo na nivel mundial.

E evento lo reuní ministerionan, formuladónan di polítika, reguladónan, operadónan di telekomunikashon, ekspertonan di teknologia, invershonistanan i lidernan di industria for di Karibe i otro paisnan pa deliberá tokante e futuro digital di e region.

Liberty Caribbean ta e patrosinadó prinsipal di e konferensha, ku One Communications i ClearSky Technologies komo patrosinadónan ‘Gold.’

Un di e karakterístikanan mas importante di CANTO 2026 ta e gran partisipashon di gobièrnunan. Te awor, 13 minister a konfirmá nan asistensia, representando Águila, Barbados, Belize, Bermuda, Islanan Cayman, Kòrsou, Dominika, Jamaica, St. Kitts & Nevis, Sint Maarten i Trinidad & Tobago. Minister Charles Cooper lo representá Kòrsou.

E konferensia lo konta ku oradónan di renombre internashonal, manera Dr. Cosmas Luckyson Zavazava di International Telecommunication Union (ITU), Ambassador Abhinav Puri i Prof. Therese Chambers di University of Technology Jamaica.

Temanan prinsipal lo inkluí Inteligensia Artifisial (AI), transformashon digital, cybersecurity, infrastruktura di broadband, finansiamentu di infrastruktura digital, energia inteligente, regulashon, aliansanan públiko-privá i inklushon digital.

Banda di e konferensha lo tin un Trade Exhibition, kaminda kompanianan internashonal lo presentá e último inovashonnan den ICT. Entre e ekspositornan konfirmá ta Liberty Caribbean, Ookla, GSMA, Calix, LACNIC, Anritsu i vários otro.

Un otro momento importante lo ta e promé entrega di e CANTO Ministerial Award for ICT Leadership & Digital Transformation, un premio ku lo rekonosé un minister ku a kontribuí di forma eksepshonal na desaroyo digital den Karibe.

Delegadonan tambe por probechá diferente benefisionan, manera 40% di deskuento na Hard Rock Hotel & Casino, 10% di deskuento riba buelonan di Copa Airlines i deskuentonan spesial pa inskripshon di gruponan.

Segun Sekretario General di CANTO, Teresa Wankin, CANTO 2026 ta representá un deklarashon di e ambishon di Karibe pa bira un aktor importante den e ekonomia digital mundial. E desishonnan ku tuma durante e konferensha lo yuda definí e futuro digital di e region pa añanan benidero.