Candice Henriquez direktor finansiero-ekonomiko i Ference Lamp presidente direktor nobo CBCS

WILLEMSTAD— Banko Sentral di Kòrsou i St.Maarten tin un presidente direktor nobo i tambe un direktor finansiero ekonómiko nobo. Ta dos puesto ku tabata vakante den e gerensia di Banko Sentral despues ku sr. Jardim a tuma retiro i bai sektor priva i sr. Doornbosch a entrega su retiro pa bai bèk Ulanda. Den un enkuentro ameno na Banko Sentral a tuma despedida di Richard Doornbosch.

Ta despues di seis aña ku e tabata na kabes di Banko Sentral, ku Doornbosch ta retirá. Awor e ta bai forma parti di hunta direktiva di Autoriteit Financiële Markten (AFM) na Ulanda. Entrante 2 di sèptèmber, Ference Lamp i Candice Henriquez lo asumí funshon di, respektivamente, Presidente i Direktor Finansiero Ekonómiko di CBCS. Na ougùstùs di 2020, Doornbosch a asumí presidensia di CBCS. Su periodo komo Presidente a mira vários desaroyo importante pa Banko sentral i sektor finansiero, manera resolushon di e problemátika di ENNIA, fortifikashon i modernisashon di CBCS su supervishon i organisashon interno, i introdukshon di florin karibense. Na Kòrsou, promé minister Gilmar Pisas a ekspresá su apresio pa e kontribushonnan ku Doornbosch a hasi den e último seis añanan. ‘Na nòmber di gobièrnu i pueblo di Kòrsou, mi ke gradisí bo pa e dedikashon eksepshonal ku bo tabatin na nos banko sentral i na nos sektor finansiero; pa bo independensia, bo fortalesa den e añanan difísil i e trankilidat ku bo a trese finalmente den Banko Sentral’”.

Candice Henriquez

Na e resepshon na Sint Maarten, minister di Finansa Marinka Gumbs a enfatisá Doornbosch su esfuersonan na fabor di Sint Maarten su posishon den e union monetario. ‘Bo a traha duru pa nos tambe por tin un lugá na mesa, pa nos por tin un bos i pa nos bos wòrdu skuchá. Esei ta algu ku ta digno di nos apresio.’ El a karakterisá Doornbosch komo ‘un sirbidó públiko dediká, un profeshonal respetá, un partner balioso i un amigu di Sint Maarten.’ Presidente interino di Hunta di Komisario, Julian Lopez Ramirez, tambe a dirigí palabra na Doornbosch na ámbos resepshon. ‘Tabatin turbulensia i bientu kontrario. Pero awe, CBCS ta pará mas fuerte. E fundeshi pa futuro t’ei awor,’ segun Lopez Ramirez. Entre otro, el a elogiá Doornbosch su dedikashon i tenasidat, su bista skèrpi i su humanidat. Na su turno, Doornbosch a gradisí personal di CBCS, e gobièrnunan i demas stakeholdernan pa e konfiansa i kooperashon risibí. Na Kòrsou, el a dirigí palabra spesialmente na e personal: ‘CBCS i personal: Mi ta spesialmente orguyoso di boso. Lo mi sinti boso falta. Boso a mustra ku por; ku dos pais chikitu por tin un banko sentral moderno, profeshonal i ku ekspertisio.’ Na Sint Maarten, el a enfatisá ku Banko Sentral ta un banko kompartí: ‘Nos no ta Banko Sentral di Kòrsou ku filial na Sint Maarten. Nos ta Banko Sentral di Kòrsou i Sint Maarten. Punto.’ El a hasi e siguiente yamamentu na Sint Maarten: ‘Sinti boso orguyoso di boso Banko. Ta boso Banko Sentral e ta. Hasi bon uso di su fortalesa.’

Komposishon nobo di Hunta di Maneho di CBCS

Hunta di Komisario a postulá Ference Lamp komo susesor di Doornbosch den e funshon di Presidente i Candice Henriquez komo Direktor Finansiero Ekonómiko. Huntu ku e aktual Direktor-Sekretario, Leila Matroos-Lasten, nan lo forma e Hunta di Maneho nobo. Kòrsou i Sint Maarten a aprobá ámbos postulashon. En espera di finalisashon di e proseso formal di nombramentu, Lamp i Henriquez ta asumí nan respektivo funshon entrante 2 di sèptèmber. Lamp tin eksperensia internashonal amplio den sektor finansiero i a desempeñá funshon ehekutivo di alto nivel, entre otro na Lehman Brothers, SNS REAAL i Bank of America. Su laso ku Kòrsou a kuminsá basta aña atras. Ta aki el a sigui enseñansa sekundario i, durante su estudio na universidat, el a kore stazje na loke e tempu ei tabata Bank van de Nederlandse Antillen. Henriquez ta den servisio di Banko Sentral for di 2005 i a desempeñá vários funshon di maneho riba tereno di análisis ekonómiko, investigashon, maneho monetario i statistik. For di òktober di 2024, e ta Manager Monetary Policy, Economics and Statistics. E komposishon nobo aki di hunta di maneho ta garantisá kontinuidat den maneho di CBCS i ta un kontinuashon di e desaroyo institushonal di Banko, basá riba e fundeshi ku a pone den e añanan ku a pasa.