Blue NAP Americas i Cloud Carib ta desaroyá un cloud soberano i sigur pa Karibe

WILLEMSTAD/NASSAU — Blue NAP Americas i Cloud Carib Limited ta ampliá nan aliansa stratégiko pa ofresé un infrastruktura di cloud soberano, desaroyá spesialmente pa nesesidatnan operashonal, legal i di seguridat di organisashonnan den Karibe.

E kolaborashon ta kombiná Blue NAP Americas, e sentro di dato di Kòrsou, sertifiká komo Tier IV/Rated-4, ku e eksperensia di Cloud Carib den cloud soberano, cybersecurity, rekuperashon despues di kalamidat i servisio di gerensia.

Huntu, e kompanianan aki ta ofresé un sistema di cloud sigur ku ta kumpli ku reglanan i ku tin sosten regional. E meta ta pa yuda gobièrnunan, institushonnan finansiero, sektornan regulá i empresanan pa protehá dato importante, limitá riesgonan i garantisá kontinuidat di nan operashonnan.

Segun e kompanianan, e reto pa organisashonnan karibense no ta solamente unda pa warda dato. E pregunta prinsipal ta, kon garantisá ku sistemanan importante ta keda sigur, aksesibel i por rekuperá despues di un interupshon? Menasanan sibernétiko, mal tempu, eksigensianan legal i dependensia di infrastruktura pafó di region, ta hasi esaki un prioridat pa gerensia i hunta di komisarionan.

“E aliansa aki ta duna gobièrnunan i entidatnan privá den Karibe mas soberania, kapasidat di rekuperashon i kontrol riba nan futuro digital,” asina Giovanni King CEO di Blue NAP Americas a deklará. Segun King, e meta ta protehá dato, operashonnan i konfiansa di e personanan ku e organisashonnan ta sirbi.

E plataforma ta ofresé un sistema kompletu pa maneho di dato, kumplimentu ku lei i regla, seguridat, rekuperashon despues di kalamidat i kontinuidat operashonal. Blue NAP lo duna sosten lokal via su Network Operations Center na Kòrsou. Cloud Carib lo duna sosten avansá durante 24 ora pa dia, 365 dia pa aña, for di su sentronan na Nassau i Atenas.

Cloud Carib a habri nobo den Guyana, Barbados, Surnam, Kòrsou i Bermuda durante e último aña. Esaki ta permití organisashonnan tene datonan importante mas serka di kas, mientrastantu nan ta mehorá nan kapasidat pa sigui funshoná i rekuperá despues di un interupshon.

COO di Cloud Carib, Victor Kovacs, a splika ku soberania berdadero ta mas ku solamente warda dato den e propio pais òf region. “Ta trata di e libertat operashonal pa laga sistemanan krusial funshoná sin miedu pa kalamidat, atakenan sibernétiko òf intervenshon for di otro hurisdikshon.”

E inisiativa tambe ta pone fundeshi pa e promé Federated Trusted Cloud Clearing House di Karibe. Esaki ta un proyekto di Caribbean Datacenter Association, Gaia-X i Cloud Carib. E meta ta fasilitá akseso sigur, transparente i soberano na servisionan di cloud desentralisá, i fortalesé kolaborashon, propiedat regional i konfiansa den e sistema digital.

Segun e kompanianan, e aliansa ta ofresé un ruta práktiko pa organisashonnan karibense ku ta modernisá. E infrastruktura cloud ta sigur, resistente i adaptá na e realidat legal, ambiental i operashonal di Karibe.

“Esaki no ta solamente infrastruktura cloud. Ta un fundeshi digital mas fuerte pa Karibe,” asina Kovacs a finalista.