CAP i CAH ta mehorá kuido di mucha na CMC

WILLEMSTAD— Curaçao Airport Partners (CAP) i Curaçao Airport Holding (CAH) a inaugurá un mural edukativo interaktivo, diferente aparato di hunga i Kòrsou su promé “Infuuts” den departamento di mucha di Curaçao Medical Center (CMC).

E meta di e proyekto ta pa krea un ambiente mas agradabel, positivo i edukativo pa muchanan ku ta risibí tratamentu médiko. E inisiativa ta forma parti di CAP i CAH nan kompromiso sosial pa invertí den bienestar di muchanan i den futuro di Kòrsou.

E mural, titulá “Pedro su Aventura di Aeropuerto”, ta konta e historia di Pedro Prikichi i su amigunan Kachi Kabritu i Tora Turtuga. Huntu nan ta pasa den diferente etapa di un biahe na aeropuerto. E mural tin weganan, charadanan, kuis i informashon interesante tokante aviashon. Esaki ta stimulá kuriosidat, kreatividat i e kapasidat di muchanan pa solushoná problema.

OZD (Omar Zimmerman Design) a diseñá e mural ku sosten di Michael Dalnoot i Kaile Finies di Pelikula Studios International. Realisashon di e proyekto a tuma mas ku un aña di preparashon i kolaborashon.

Un otro parti importante ta e donashon di Kòrsou su promé “Infuuts”. Esaki ta un baiskel spesial pa mucha ku ta risibí infüs. E ta permití nan move, hunga i komuniká ku otro mucha sin mester keda mará na kama. Esaki por hasi nan estadia den hospital mas aktivo, independiente i agradabel.

CAP i CAH a duna tambe aparato di hunga i muebel pa enrikesé e departamento di mucha. Representantenan di CAP, CAH, CMC, Ronald McDonald House Curaçao, gobièrnu, prensa i boluntarionan di aeropuerto tabata presente na e inaugurashon.

Ku e proyekto akí, CAP i CAH ta reafirmá nan kompromiso pa sostené hubentut di Kòrsou, fortalesé kolaborashon den komunidat i krea un impakto positivo ku ta bai mas leu ku aeropuerto.