Aqualectra ta informá ku situashon a normalisá

WILLEMSTAD—Situashon a normalisá, esei ta loke e kompania di utilidat lokal Aqualectra a informá riba retnan sosial den oranan di mardugá. E kompania ta splika ku for di e momentu ei 12:26 am, tur kas tin koriente bèk. E pronóstiko di Aqualectra ta ku pa awe djadumingu 16 ougùstùs, e situashon di koriente lo keda stabil. Ademas ta indiká ku nan ta na altura ku e situashon no tabata agradabel, pero huntu ku komunidat a pasa den dje. ‘Un biaha mas, nos ke yama kada kliente danki pa a karga ku nos durante e oranan tras di lomba.”

Ayera nochi, banda di 11’or tabatin algun bario manera Roi Catootje, Fransia i otronan ku a keda sin koriente. Na vários parti lusnan di tráfiko no tabata funshoná optimal.

Na kuminsamentu di ougùstùs Regulatory Authority Curaçao (RAC) a publiká un rapòrt ku a hasi relashoná ku ‘blackout’ na Kòrsou. E echo ku hinter e pais a keda sin koriente pa basta ratu a kousa hopi malkontentu, pero tambe preokupashon den e konfiabilidat di suministro di koriente.

Di e rapòrt ei di RAC, Clarity a nota dos parti ku ta duna un splikashon mas general. ‘E investigashon (riba e blackout) a mustra ku generalmente por nota progreso den e sistema di elektrisidat riba tres área di atenshon fundamental, esta: seguridat di sistema, produkshon di elektrisidat i stabilidat di ret, pero tambe organisashon i proseduranan. Asina a desaroyá i implementá un gran parti di filosofia di seguridat kompletamente revisá. Tambe a instalá un sistema di almasenahe di elektrisidat den bateria pa mehorá e maneho di e ret eléktriko, i a adaptá e organisashon tékniko konforme e nesesidatnan di e operashon. Ya a i lo sigui atendé debidamente ku e puntonan fundamental di mehorashon ku a bin dilanti den pasado riba e áreanan aki. Awe nan ta kontribuí na un suministro di elektrisidat mas stabil i konfiabel.”

RAC ta sigui mustra, ku apesar ku nunka no por ekskluí interupshonnan di koriente kompletamente, e mehorashonnan implementá ta redusí e riesgo i ta yuda limitá e konsekuensianan den kaso ku tòg nan tuma lugá. E oumento den kompleksidat di suministro di koriente, entre otro pa motibu di transishon energétiko sostenibel, ta rekerí atenshon kontinuo pa garantisá stabilidat i konfiansa. RAC lo sigui kontribuí ku esaki pa medio di supervishon transparente den e sektor.