Situashon koriente na Kòrsou ta realmente delikado

WILLLEMSTAD— Situashon di koriente ta realmente hopi delikado. Aqualectra a informá for di djabièrnè 14 di ougùstùs ku pa djasabra por spera ku ta bai hiba un sistema di schakel, kitando koriente di sierto áreanan durante di un ratu di mas o ménos 2 ora i despues e áreanan ei ta haña koriente bèk. Sin embargo riba e djasabra aki, vários área a pèrdè koriente for di 2:30 di mèrdia.

Esaki ta e informashon ku e kompania a suministrá: ‘Segun pronóstiko di awe mèrdia, ta mustra ku e fluho di bientu a baha muchu mas tempran di loke nos a antisipá. Na e momentunan akí nos baterianan ta kargando ku e suministro, pero esaki ta nifiká ku lamentablemente nos lo mester kuminsá ‘schakel’ for di 2:30’or di atardi.

Nos ta trahando riba e skema adaptá di bario i áreanan. Un djis nos lo kompartí esaki ku bo. Di tur manera, e promé barionan menshoná den e skema publiká ayera (orario 7pm pa 9pm) lo ta e proménan pa pèrdè koriente.

Nos sa ku durante periodonan asin’aki, prinsipalmente awe ku ta hopi kalor, no ta dushi pa pèrdè koriente i nos ke ofresébu nos diskulpa pa esaki. Durante dia, miéntras nos ta sigui monitoreá e situashon, nos lo sòru pa mantenébo informá di kualke desaroyo.”

Aqualectra a splika riba retnan sosial tambe ku e situashon a konfrontá mas partinan delikado kual a kondusí na e desishon pa kuminsá schakel mas tempran.

‘Nos tin interupshon riba nos ret di koriente ku konsekuensia ku nos ta “schakel”. Den kaso bo bario pèrdè koriente, lo bo haña bek denter di 2 ora. Nos ta “schakel” pa parti e suministro di koriente i evitá ku sierto barionan so ta keda sin koriente muchu largu.”

Manera indiká tin un skema di barionan ku lo mester a pèrdè koriente durante di djasabra anochi pa mardugá, pues mihó tur hende prepará pa loke ta sigui.