Lei di ARBO pa trese rèspèt pa e trahadó!

WILLEMSTAD— Den e spiritu di konmemorashon 30 di Mei 1969, kaminda pueblo i trahadónan di Kòrsou a lanta nan bos pa dignidat, hustisia sosial i igualdat, MAN-PIN ta enfatisá ku tur trahadó tin derechi riba un ambiente di trabou sigur, salú i digno. E lucha di nos trahadónan no por wòrdu lubidá, i mester sigui reflehá den lei i maneho ku ta protehá e hende, e mama, e tata i e hóben ku tur dia ta lanta bai traha di un manera digno.

Pa e motibu aki Frakshon MAN-PIN a presentá un lei di inisiativa “ARBO Kòrsou”, ku ta enfoká riba protekshon di trahadónan kontra insiguridat físiko i mental den tur sektor. E lei aki lo remplasá e Lei riba Siguridat ku ta data di 1958, ku un sistema moderno i di akuerdo ku normanan internashonal di Organisashon Internashonal di Labor (ILO) .  

MAN-PIN ta enfatisá ku tur trahadó tin derechi riba un ambiente di trabou sigur, salú i digno. E inisiativa di lei ta enfoká riba prevenshon di situashon di peliger pa seguridat i salú di trahadó. E dunadó di trabou lo tin e obligashon pa identifiká riesgo sistemátikamente i tuma medida pa prevení aksidente na trabou, malesanan relashoná ku e trabou , profeshon i problema psiko-sosial manera burn-out òf intimidashon.

E lei ta fortalesé derechi di trahadó, manera derechi na informashon i entrenamentu tokante siguridat na trabou. Pero tambe derechi pa stòp òf rechasá trabou peligroso den kaso di peliger serio, huntu ku protekshon kontra represaya ora un trahadó tuma akshon pa su seguridat. Por último e inisiativa di lei ta fortalesé kontròl i maneho di inspekshon laboral, ku sankshonnan mas severo pa violashonnan grave tambe i sòru ku e trabou ta unu digno i sigur.