WILLEMSTAD – Otro kaso kaminda ta trata di strañero bibá na Kòrsou ku a presentá den sala di korte dia 22 di aprel último, ta esun di e hòmber dominikano Jersson A. di 29 aña di edat, kende lo a drenta kas di un señora, pa viol’é. Den sala di korte e impreshon ku e akusado Jersson a krea ta esun di un persona ku no ta masha bon na kabes. E tin problemanan mental i alabes e ta un uzadó di mariwana. Jersson ta akusá di a drenta kas di un señora ku su moketanan será, gritando ku e ke e señora aki su parti íntimo pa traha kuné. Ta trata aki di un suseso ku lo mester a tuma lugá dia 14 di yanüari 2026. E akusado Jersson lo mester a dal e señora den kara i kuminsá mishi na esaki su kurpa pa oblig’é pa hasi sèks kuné. Pero, e víktima a resistí fuertemente i a kuminsá grita pa alertá tur ku por a tende maske ta na distansia. E akusado Jersson a ninga redondamente ku el a trata di violá e señora.

Un otro hòmber ku yama Ramirez a presentá na sierto momento pa sali na defensa di e víktima i aki a start un bringamentu entre e dos hòmbernan (esta e akusado kontra Ramirez). Den sala di korte e akusado Jersson a ninga kategórikamente di a trata na violá e señora pero a atmití ku el a bringa ku Ramirez. Abogado mr. Brug a sali fuertemente na defensa di su kliente indikando ku den 52 sekònde ta imposibel pa su kliente por a violá e señora, pasobra segun imágennan di vidio ta pa apénas 52 sekònde e akusado Jersson lo a drenta i sali den e kamber di e señora. Pues segun e abogado e señora klaramente a gaña riba e akusado, kende ta subrino di un hòmber ku yama Stanley i kende ta hür bibienda ku e señora akí i otronan. Aparentemente e señora debe Stanley plaka di hür.

Fiskal señora mr. T. Keller tabata hopi fuerte na palabra, basando riba deklarashonnan di testigu i pòtrètnan ku a mustra e akusado Jersson algun biaha den serkania di e señora. Mas aleu fiskal a indiká ku e akusado aki no ta sigurá pa gastunan di tratamentu médiko, anto ademas su estadia na Kòrsou no ta reglá tampoko, esei ke men ku lo pone imigrashon na altura. Abogado mr. Brug a sigui insistí ku su kliente ta keda akusá inhustamente ya ku polisnan no a haña ningun señal na kurpa di e señora. E señora no tabatin ningun marka di sla òf kualke otro indikashon di e supuesto violashon na su kurpa. E suseso akí lo a tuma lugá den oranan di mèrdia, entre 12.30 pa 13.00’or den un di e kambernan ku Stanley ta hür.

Echo ta ku riba e dia ei e akusado Jersson no a bebe su remedinan, siendo e ta un persona ku ta sufri di ADHD i un malesa mental, pa kua motibu e ta bou di tratamentu di sikiater. Ademas e ta adikto na mariwana i alkohòl. Segun fiskal ta trata aki di un persona ku mester tene kuenta kuné pa e no hasi su mes ni otronan daño. E señora víktima ta traha na Mangusá i a pidi daño i perhuisio, pasobra el a keda sin presentá na trabou di manera ku Mangusá no ta pag’é. Tambe e señora a splika ku el a keda troumatisá pa loke el a pasa aden. Fiskal a demandá un kastigu di prizòn di 24 luna di kua 12 luna kondishonal i un periodo di prueba di 3 aña, i tambe tratamentu di parti di Reclassering.

Wes señora mr.Engelbrecht a yega na e siguiente kondena: 18 luna kastigu di prizòn di kua 12 luna kondishonal i 3 aña di prueba, mará na guia di Reclassering, sikiater i sikólogo. Abogado mr. Brug na final a indiká ku su kliente lo bai den apelashon kontra di e sentensia.