WILLEMSTAD – Prinsipalmente den wikènt tin vários diskoteka na Kòrsou, kaminda latinonan sa bini huntu, dal drinks pa despues bringa ku otro teriblemente. Esaki tabata e kaso atrobe dia 16 di yüni 2025 riba Rooseveltweg. Akí e hòmber venezolano Franklin C. (37) a kibra un bòter di serbes, kaba heridá un otro ku yama Valencia O. malamente. E víktima a keda ku heridanan na kabes, skouder i garganta.

Promé e venezolanonan aki a bringa ku otro den e diskoteka, pero djei a saka nan pone pafó, di manera ku e pelea a sigui riba kaya. Tabatin korementu tras di otro, tiramentu ku skòp i finalmente kòrtamentu ku bòter di serbes kibrá. Durante tratamentu di e kaso djarason 22 di aprel último, e akusado Franklin a bini ampliamente na palabra pa splika ku e kier a djis yuda un amigu ku tabata den un problema. Su intenshon tabata únikamente pa kita su amigu for di esnan ku tabata den bringamentu kuné. E akusado Franklin despues di e intento aki a sali na kareda, pero su tras a sigui un grupo di hòmber, tambe venezolano. Na sierto momento Franklin a kai a bou na suela i e otro venezolanonan a kuminsá batié ku skòp. Den e situashon aki, esta drumí abou na suela, el a pasa man kue un bòter di serbes bashí, kibr’é i kuminsá zuai ku e bòter riba kurpa di Valencia, heridando esaki na vários parti di esaki su kurpa. Den sala di korte e akusado Franklin a sigui bisa ku tres hòmber tabata agredié i ku e mester a defendé su kurpa. Abogado mr. S.F. Osepa, kende a hiba e defensa na nòmber di Franklin a argumentá ku su kliente tabata den un situashon hopi fèrfelu i mester a lucha pa su bida kontra di tres hòmber.

Franklin ta un trahadó di palapa i ta tata di 6 yu bibá na Venezuela. Ta un persona ku ta traha duru pa por mantené su mes na bida. Na Kòrsou, te asina leu ku outoridatnan sa, nunka Franklin a hañ’é ku hustisia. Den bista di fiskal ku a papia na nòmber di Ministerio Públiko, e víktima Valencia a keda malamente heridá i kasi por a kòrt’é na órganonan delikado ku por a kous’é su bida. Fiskal a demandá un kastigu di prizòn di 24 luna, kitando e periodo ku a pasa den aresto preventivo. Abogado mr. Osepa a argumentá ku su kliente na e momento ei a enfrentá hòmbernan venezolano mal drogá i alabes bou di influensia di alkohòl. Pues su kliente no a hasi nada otro sino defendé su mes. Mas aleu e abogado a trese padilanti ku a gaña riba su kliente, anto ku e víktima a bini ku un historia ku no ta kuadra at all, pasobra kon por ta ku a bati e víktima i maltrat’é tantu, anto tòg el a kore tras di su kliente? E víktima a demandá un suma dia daño i perhuisio na rason di 6000 i piku florin.

Wes señora mr. N. Engelbrecht a keda ku dia 13 di mei binidero lo e dikta sentensia.

Erwin Raphaëla