WILLEMSTAD – Su ekselensia gobernador di Kòrsou Mr. De Kort a risibí sr. Giovanni King, Chief Executive Officer di Blue NAP Americas (BNA), kende alabes ta presidente di Caribbean Datacenter Association (CDA), riba 23 di aprel 2026 pa un interkambio konstruktivo di ideanan tokante e ròl di tur dos organisashon den e futuro digital di Kòrsou.

Durante e kombersashon, a pone atenshon amplio na e posishon stratégiko di BNA komo e úniko datacenter Tier-IV/Rated-4 den e region i unu di dos den Reino Hulandes. BNA tin ambishon di sigui desaroyá su mes pa bira un asina yamá “anker datacenter” di Karibe.

Ademas di esaki, CDA ta traha riba un red regional di datacenters interkonektá, pa sostené e transformashon digital den e region. For di e interkambio di ideanan a sali kla e importansia kresiente di desaroyo di un di kuater pilá ekonómiko pa Kòrsou, enfoká riba e ekonomia digital. Den e kuadro ei, a duna atenshon spesial na e konsepto di soberania di dato, ku ta di gran importansia pa protehá interesnan nashonal, miéntras ku ainda ta keda espasio pa kolaborashon regional i internashonal.

Ademas, a papia tokante e nesesidat pa fortifiká mas tantu e kuadro hurídiko pa protekshon di datonan personal. A enfatisá ku banda di leinan moderno, tin mester di instrumentonan efikas pa aplikashon di lei. Un kuadro sólido i konfiabel ta krusial pa konstruí konfiansa, atraé invershon i posishoná Kòrsou komo un hub digital sigur i konfiabel den e region Karibe.