WILLEMSTAD – Un siudadano di fam Martina, kende tin 61 aña di edat, dia 4 di ougùstùs 2024 a hòrta 1 tas ku kontenido ku ta pertenesé na un persona di fam van Dijk. Pa tal motibu el a presentá den sala di korte djabièrnè 24 di aprel último pa para responsabel pa e akto kastigabel kometé. E suseso aki a tuma lugá na playa, Daaibooi-Portomarie. Doño di e tas tabata na e momentonan ei den laman, landando i disfrutando di e dushi naturalesa kurasoleño, miéntras e akusado Martina a pasa man grap e tas ku tabata riba un baranka, bai kuné. Segun Martina, kontestando pregunta di wes, el a mira e tas abou na suela i a disidí di kue bai kuné, e no a mira ningun otro persona den serkania. Ta trata aki di un ‘rugtas’ masha bunita mes, segun e propio Martina. Wes a puntra Martina si por a pasa den su kabes ku talbes ta ‘rugtas’ di un persona ku na e momento ei tabata landa. El a kontestá ku no.

Martina djei a sigui landa i a subi Playa Daaibooi. E tas tabata ku kontenido, esta telefòn i otro pertinensianan di importansia pa su doño. Martina na sierto momento a kana bai i drenta su pikòp. Wes mesora a splika Martina ku e otro personanan presente sintá na bar debidamente a mira Martina kue e tas, di manera ku nan por a duna un deskripshon eksakto di Martina. Asina ei tin e deklarashon di a mira Martina kana drenta mondi ku e tas. Segun Martina e no a ni habri e tas, pero otronan a haña e telefòn den awa bentá, miéntras e otro pertinensianan ku tabata den e tas, tambe a disparsé.

Martina ta un siudadano ku tin un pasado ku hustisia, e tin un karchi di kastigu. Hasta na Ulanda Martina lo a pasa den algun problema ku hustisia, pero esei apsolutamente no ta bèrdat, pasobra nunka e no tabata na Ulanda, segun señor Martina su deklarashon na wes.

Enfin, ta parse ku Martina a kambia su bida, awor ku el a lanta un negoshi i ta atendé tur su asuntunan ku seriedat. Ademas e ta kue djòp di mantenshon di kurá di un persona i ta gana 1000 florin pa luna. Tabata na luna di desèmber ku Martina su kasá a fayesé.

Despues ku doño di e tas a sali fo’i laman, manager na e sitio aya na playa, huntu ku algun otro persona ku a mira Martina hòrta e tas, a laga mas òf ménos 1 ora pasa pa reis riba Martina na Daaibooi. Polis a bin na e sitio i a hiba Martina warda di polis, kaminda el a pasa algun ratu, pero promé ku anochi mes el a regresá kas. Wes a mustra Martina ku loke el a hasi ta un akto kastigabel, pasobra akI ta nada otro sino ladronisia. Fiskal señora mr. van der Zee a demandá un kastigu di trabou di 30 ora, mará na un periodo di prueba. Wes tòg a disidí otro, pasobra ya tin 2 aña ku Martina a kometé e akto kastigabel aki. Wes a yega na un simpel ‘waarschuwing’ pa Martina, mará na 30 ora di trabou kondishonal. Esei ke men si Martina bolbe kai den problema ku hustisia pa kuminsá e lo mester traha e 30 oranan di trabou. Martina hasiendo uzo di su derechi pa duna su opinion a deklará ku e lo keda leu for di hustisia. Ohalá Martina mantené su promesa i keda enbèrdat leu for di hustisia.