WILLEMSTAD – Un hòmber di fam Hinkert tabata den sala di korte djabièrnè 24 di aprel último pa tratamentu di su kaso proforma. E siudadano aki ta un bon konosí di hustisia, e tin 50 aña di edat. Su kaso no a keda tratá riba kontenido ainda, esei lo sosodé dia 19 di ougústús binidero. Fiskal señora mr. Keller a splika ku tin algun investigashon importante ku mester tuma lugá ainda. Entre otro polis ke bolbe interogá Hinkert. Ta akusa e siudadano aki di 6 hecho kastigabel i eseinan ta:

(1) Ladronisia di outo di 9 di yanüari 2026, esta un pick-up blanku di e marka Nissan (model Frontier ku e plachi di number X83-81, ku vários hèrmènt.

2) Intento di ladronisia di un pick-up marka Kia, ku e plachi di number U18-34.

(3) Ladronisia den un kas na Bottelier dia 11 di yanüari 2026 i aki e ladron a bai ku 1 televishon. (4) Ladronisia den un otro kas na Bottelier dia 11 di yanüari 2026, bayendo ku 1 baiskel koló blou.

(5) Ladronisia dia 13 di yanüari 2026 na Bottelier den un otro kas, aki e sospechoso lo mester a bai ku un slang.

(6) Ladronisia dia 13 di yanüari 2026 na Kaya Acacia, e ladron a bai ku 5 lus solar.

Djis despues ku fiskal a kaba di hiba palabra e akusado a start hinter un beheit, gritando ku e no ta koperá ku ningun investigashon di polis i ku e pick-up tabata di un ‘chamo’, anto ku un chamo a hòrta kosnan ku outoridatnan ta buska i ku e ladron aki, segun Hinkert, ta den eksterior, anto ku esaki lo no regresá Kòrsou por lo pronto.

Tambe Hinkert a menshoná un number di telefòn, pero no sa apsolutamente pa kua rason i of ku ki propósito!! Finalmente wes a disidí ku tratamentu di e kaso aki lo ta dia 19 di ougùstùs binidero riba kontenido.