Ta basta: 40 aña ta warda Domeinbeheer pa atendé tereno

WILLEMSTAD—Ya pa algun tempu kaba ku Elvin Gerard ta pidi atenshon di gobièrnu i spesífikamente minister Cooper pa atendé ku petishonnan di siudadanonan di Kòrsou pa tereno. Tin vários kaso kaminda siudadanonan ta pidi pa atendé e kambio di título di un tereno di huurgrond pa erfpacht òf petishon di hopi aña di famia ku simplemente nunka a haña atenshon di Domeinbeheer.

Ta parse ku awor si hendenan a fada i huntu ku e eks parlamentario Gerard a bai ofisina unda e sekretario general di e ministerio di VVRPA ta sinta den Skalo, patras di e edifisio di Biblioteka Públiko bieu. E grupo tabata bastante rabia i a ekspresá mal kontentu ku hendenan di pueblo mester warda hopi aña te asta dékada riba Domeinbeheer, miéntras ku otronan (makamba) si lo ta keda kla hopi lihé. Gerard asta a deklará públikamente ku último tempunan tur tereno ku Kadaster entrega ta petishonnan nobo. Pues petishonnan di hopi tempu atras ta keda warda den lachi. Un siudadano a bisa ku el a hasi petishon pa regla su papelnan pa un tereno 40 aña pasá i te awe ainda e no por keda kla.

SG Dwigno Puriel a tuma un karta ku firma di hendenan ku ta protesta i ku e palabrashon ku despues lo duna komentario.