WILLEMSTAD— Kosto di bida ta subi i tur dia ta bira pio, anto banda di esei pueblo ta haña e gòlpi di e subida drástiko di preis di gasolin ku 60 sèn pa liter, anto pa kolmo pueblo ta keda asotá pa un subida alarmante di kasonan di ladronisia di piesa i di outo na Kòrsou. Tur dia por tende di outonan ku ta ser hòrtá òf bùmper, porta, lus i otro piesanan di outo ku a keda hòrtá. Pa e doño di outo, ku mester sòru pa yunan bai skol i kumplí ku obligashon di transporte pa kas i trabou, esaki ta otro sla den su pòtmòni. E situashon aki no ta kousa daño material so, pero tambe hopi angustia, frustrashon, rabia i inseguridat den kas di famia i komunidat. Pueblo a yega su límite, asina Yaël Plet di MAN-PIN ta duna di konosé.

E partido ta haña ku e situashon di tantu ladronisia di outo ta afektá turismo. Turistanan ta haña un mal sabor di estadia na Kòrsou i e ta krea un mal imágen di e pais aki. Miéntras ku empresarionan chikí di hürmentu di outo tambe ta keda afektá.

Riba medionan sosial publikashon di outonan ku ta ser hañá plumá, òf yamadanan desesperá di pueblo pidiendo yudansa pa haña e outo ku a keda hòrta a bira notisia di tur dia. Ta bin aserka ku praktikamente no ta mira polis riba kaya, ni di dia i anochi ta pió. Pueblo a yega na su límite. Di un banda hende ta sinti ku no tin protekshon di parti di hustisia i ku malechornan ta hasi i deshasí manera nan ke. Di otro banda gobièrnu ta konsehá pueblo pa e mes protehá su propiedat. Esaki ta trese mas gastu pa e pueblo ku ya ta paga tur sorto di belasting pa e pone medionan di seguridat. En bista di e  preisnan haltísimo pa kombustibel, seguro, impuesto di outo i gastunan di mantenshon di outo, pa hopi kas di famia no ta sobra sèn pa pone sensor i kandal pa outo.

Plet ta sigui bisa ku frakshon MAN-PIN a manda un karta pa Minister di Hustisia ku pregunta i petishon pa atendé e problema aki urgente for di 28 yanüari 2026, pero te ainda nada di kontesta. MAN-PIN ta insistí ku no por sigui sinta man krusá i laga ladronnan fiesta miéntras ku pueblo sigui sufrí.

Pa e motibu aki, nan ta bolbe pidi un reunion públiko di Parlamento ku Minister di Hustisia pa trata e tema aki urgentemente.