Preis di gasolin i diesel ta oumentá

WILLEMSTAD – E tarifa pa usuario di tantu Mogas 95 komo Gasoil (U)LSD ta subi kompará ku luna anterior, prinsipalmente komo resultado di preisnan di kompra internashonal mas haltu. Esei ta loke Regulatory Authority Curaçao ta anunsiá den un informe ofisial. E preisnan na pòmp ta aktualmente Cg 2.597 pa liter di gasolin i Cg 2.373 pa liter di diesel. Manera ámbos ta subi kompará ku luna pasá.

RAC ta splika ku e tenshonnan geopolítiko ku ta kontinuá ta sigui pone preshon riba e preisnan internashonal di krudo i kombustibel, resultando den preisnan mas haltu. Partikularmente, e preis di kompra di Gasoil (U)LSD ta mustra atrobe un subida konsiderabel. Gasolin ta konosé un oumentu i ta yega Cg 2.725 pa liter. Diesel tambe a subi i ta bira Cg 2.819 pa liter. Gas un bia mas ta keda igual pa loke ta trata preis.

E atakenan riba infrastruktura petrolero Ruso ta un faktor importante den e subida aki, konsiderando e papel importante ku Rusia tin den e suministro mundial di diesel. Pa limitá e impakto di e subida aki riba e tarifa usuario final, a apliká un redukshon den e komponente di surplus/défisit. E medida temporal di mitigashon aki ta limitá impakto di e subida riba e tarifa usuario final durante e luna aktual. Ta spera di rekuperá e efekto di e medida aki den e lunanan benidero.