Polis buskando testigu den kaso tiroteo Rooseveltweg

WILLEMSTAD – Outoridatnan polisial ketu bai ta buskando hende ku por tin informashon di un kaso ku e tuma lugá dia 14 di yüni último na altura di un botika riba F.D. Rooseveltweg. Riba e djadumingu 14 di yüni 2026, entre 17.30’or i 18.00’or, dos sospechoso maskulino, ámbos armá ku arma di kandela, a lòs vários tiru den direkshon di un grupo di kuater persona.

A base di e investigashon te ku awor, tin sospecho ku e duo aki tabatin e intenshon di kita bida di un òf mas persona den e grupo. Afortunadamente ningun persona a keda gravemente heridá durante di e insidente. Despues di nan akto, e dos sospechosonan a hui for di e sitio den un Kia Rio koló shinishi ku glas skur, probablemente di fabrikashon 2022–2024. Polis ta hasi un yamada na komunidat pa yuda ku informashon ku por kontribuí na solushon di e kaso.

Polis ta buska spesífikamente personanan ku: • a mira òf tende algu dia 14 di yüni 2026, entre 17.30’or i 18.00’or, den besindario di F.D. Rooseveltweg; • a presensia e tiroteo; • tin informashon tokante di e dos sospechosonan maskulino; • tin informashon tokante di e Kia Rio koló shinishi ku a wòrdu usá; • a mira e vehíkulo promé òf despues di e insidente; • tin grabashon di kámara, potrèt òf video riba kua e sospechosonan, e vehíkulo òf otro informashon importante ta visibel. Si bo ta disponé di informashon tuma kontakto ku polis na 917 òf 108.