Muhé detené pa intento asesinato

Djamars 18 di ougùstùs 2026 alrededor di 18.07’or, un unidat polisial mester a bai na un adrès den Faradayweg pa problema entre dos bisiña. Na su yegada, un di e bisiñanan, den e kaso aki un hòmber, a deklará na polis ku e tabatin diskushon ku su bisiña muhé. Durante di e diskushon, e dama a basha gasolin riba dje i indiká ku lo e pega e hòmber na kandela. Alrededor di 18.55’or, polis a hasi detenshon di e dama S.S.K. di 35 aña di edat nasé na Kòrsou pa intento di asesinato i menasa. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.

Vehíkulonan na kandela

Djárason 19 di ougùstùs 2026 alrededor di 03.59’or, un unidat polisial a keda dirigí pa un adrès den Frederikstraat, pa un vehíkulo ku tabata na kandela. Habitantenan a tende un eksploshon i despues a mira un persona kore bai for di e sitio. Unidat di brantwer ku a yega a paga e kandela, pero no por a evitá ku e vehíkulo a kima kompletamente. E kaso aki ta sigui den investigashon.

Djárason 19 di ougùstùs 2026 alrededor di 01.48’or, Sentral di Polis a dirigí un unidat polisial pa Puttenstraat pa un pikòp ku tabata na kandela. Na yegada di e patruya, el a konstatá algun saku di plèstik riba stul di e ko-okupante ku a wòrdu pegá na kandela. Personal di brantwer ku a yega rápido na e sitio, a pone ku e daño na e pikòp a keda limitá. Investigashon den e kaso aki ta kontinuá.

Chapaleta di boto a herida dama

Djárason 19 di ougùstùs 2026 alrededor di 09.42’or, Sentral di Polis a dirigí unidatnan di Polis i di Politur pa Playa Piskadó pa un aksidente, na unda chapaleta di un boto a heridá un dama turista. Segun promé investigashon, e turista tabata snòrkel, na momentu ku un boto ku ta wòrdu usá pa piskadónan a pasa i e chapaleta a alkansá e turista. E turista a risibí kòrtá na su brasa robes i na su hep. Ku ambulans a transportá e turista pa Sala di Emergensia di C.M.C. pa tratamentu médiko. Personal di Politur ta kontinuá ku e kuido posterior miéntras investigashon den e kaso ta sigui.

Hòmber(61) a haña ataka riba seru i fayesé

Den ora nan di djárason mainta di 19 di ougùstùs, Sentro Operashonal Marítimo di Wardakosta (MOC) a risibí un yamada di Kuerpo Polisial pidiendo asistensia na Seru di Kristòfel.  Ta trata di un hende hòmber lokal di 61 aña di edat ku a bira malu durante di su kaminata. 

Tambe a informá miembro nan di parke nashonal ku a move bai mes ora serka e persona pa duna asistensia. Na un dado momento e kondishon di e mener a eskala di tal manera ku mester a inisiá ku reanimashon. Simultáneamente, personal di MOC a alerta un unidat di e helikòpter di Wardakosta pa sali den direkshon di Seru di Kristòfel.  Despues di a reskatá e persona, a kontinuá ku intentonan di reanimashon ta na momento ku a yega e base di Wardakosta na Hato. Apesar di tur esfuerso, personal di ambulans ku tabata presente na Hato a konstatá ku e persona no tabata duna señal di bida mas. Di parti di Wardakosta, Kuerpo Polisial, Parke Nashonal di Kristòfel i tur otro instansianan involukrá den e kaso, nos ke ekstendé palabra nan di kondolensia i ta deseá famia i amigunan hopi forsa durante di e momento difísil aki.