WILLEMSTAD— Gobièrnu di Kòrsou ta dal e siguiente paso importante den desaroyo di su Strategia Nashonal di Inteligensia Artifisial (AI). Pronto lo kuminsá un ròndu di konsulta amplio ku representantenan di enseñansa, siensia, sektor empresarial, organisashonnan sosial i gobièrnu. Meta di e konsulta aki ta pa desaroyá un strategia ku ta garantisá ku AI ta wòrdu apliká di un manera responsabel na benefisio di nos komunidat i pa sostené e desaroyo duradero di Kòrsou. Minister Sithree van Heydoorn, Minister di Enseñansa, Siensia, Kultura i Deporte i Presidente di e Grupo Ministerial ku ta liderá e desaroyo di e Strategia Nashonal di AI di Kòrsou, ta hasi un yamada na tur persona i organisashon ku keda aserka pa partisipá aktivamente den e proseso di konsulta. “E strategia aki no lo keda skirbí tras di un buro. Nos ke skucha nos komunidat i huntu determiná kon AI por kontribuí na un Kòrsou mas fuerte, mas inovativo i mas inklusivo. P’esei mi ta invitá tur hende pa pensa huntu ku nos i traha huntu na nos futuro komun.” Direktor di Regulatory Authority of Curaçao (RAC) a keda apuntá pa Gobièrnu komo Koordinadó di e Strategia Nashonal di Inteligensia Artifisial. Den e funshon aki, RAC lo koordiná e konsulta nashonal, fasilitá kolaborashon entre tur partidonan involukrá i sigurá ku e aporte di tur sektor wòrdu inkluí ku kuidou den e desaroyo kontinuo di nos Strategia Nashonal di AI. E Strategia Nashonal di AI ta sigui konstruí riba e konosementu balioso ku a sali for di e UNESCO AI Readiness Assessment, na kua vários organisashon a kontribuí. Ademas, Kòrsou lo tene kuenta ku formatonan internashonal, manera e UNESCO Caribbean AI Policy Roadmap, pero lo desaroyá su propio maneho di AI ku ta adaptá na e nesesidat, ambishon i realidat di nos pais.

AI ta ofresé oportunidat pa fortifiká nos ekonomia, prepará hóbennan mihó pa e merkado laboral di mañan, mehorá kuido di salú i hasi servisio públiko mas inteligente i mas aksesibel. Na mes momentu, Gobièrnu lo sigui duna atenshon na privasidat, seguridat, transparensia i uso étiko di AI. Teknologia mester semper sirbi hende. Gobièrnu ta mira partisipashon amplio komo esensial pa e éksito di e strategia. Dor di reuní konosementu, eksperensia i ideanan di nos komunidat, lo krea un base di maneho ku ta stimulá inovashon i protehá nos balornan sosial. E konsulta lo kuminsá pronto i Gobièrnu ta spera riba e kontribushon aktivo di tur organisashon i siudadano invitá pa huntu traha na un Strategia Nashonal di AI ku ta prepará Kòrsou pa futuro.