26 atleta ta partisipá di 15 pa 19 di yüli próksimo
Kòrsou bon representá na Repúblika Dominikana, durante Mundial di Ekitashon
WILLEMSTAD— Kòrsou lo ta bon representá na Repúblika Dominikana, durante di e Mundial di Ekitashon, ku ta tuma lugá dianan 15 pa 19 di yüli próksimo. E mundial ta konta tambe ku partisipashon di 9 otro pais manera Merka, Colombia, Venezuela, Ecuador, Puerto Rico, Canada, Aruba, Panamá i Repúblika Dominikana ku kada dos aña ta bini huntu pa partisipá den e tremendo Mundial di Ekitashon.
E organisashon lokal Aspafiko a tene un enkuentro den fin di siman pa hasi entrega di unifòrm i asesorionan na su selekshon di 26 atleta ku lo bai sali pa Repúblika Dominikana i representá Kòrsou den Mundial di Ekitashon. Aki e atletanan lo monta nan kabai i hasi pruebanan reglamentario pa finalmente e wesnan saka e ganadónan den e diferente kategorianan.
Presidente di Aspafiko Alfonso Zinhagel huntu ku su tim a duna algun palabra di motivashon na e tim pa despues hasi entrega di tur e asesorionan i tambe algun produkto nesesario pa e atletanan aki por biaha kuné i ta bon representá. Aspafiko, ku ta un nòmber konosí den e deporte di kabai pa hopi aña, ta stimulá grandi i chikí pa forma parti di e deporte i sera konosí ku e mundu kabayista.
Direktiva ta invitá pueblo di Kòrsou kompletu pa siguí e trayektoria aki atraves di e página di Facebook i Instagram pasobra e efektonan di Blue Wave lo sigui manifestá su mes na Repúblika Dominikana!!!
