Den korte akusado tabata drumi riba e mesa manera e no tin atenshon mes

WILLEMSTAD – Dia 13 di desèmber 2025, e siudadano di fam Crump a tira un otro siudadano di fam Coffie ku un arma di kandela mata. E asesinato aki tabata den serkania di un trùk di pan ku yama  ‘No me olvides’ den e bario Dein. Remarkabel ta ku tabata na apénas 1 meter di distansia, despues di un pleitu, entre nan.

Crump i Coffie tabata konosé otro for di skol, pero e situashon entre e siudadanonan aki no tabata asina bon, pasobra den pasado kaba nan a yega di bringa ku otro. Pero remarkabel ta ku ningun momento so no a sali na kla ta pa ki motibu presis e asesinato di Coffie a tuma lugá. 19 aña di edat e siudadano di fam Crump tabatin dia el a asesiná Alex Coffie ku un arma di kandela, siendo e víktima Alex Coffie tabatin 17 aña di edat.

Djis despues di e asesinato, Crump a drenta su outo (un Chevrolet Spark koló pretu) i kore bai for di e sitio. Segun un testigu, Crump a kore ku su outo bai baha un mucha muhé na un kas pa uriná, miéntras un otro amigu a keda sintá den e vehíkulo ta warda. Segun e persona ku a keda sintá den e vehíkulo ta warda na e sitio, a surgi un pleitu entre Crump i Alex ku tambe a kore yega na e sitio. Alex a kana bini serka Crump i nan a kuminsá pleita i despues bringa. E testigu a deklará di a skucha Crump bisa Alex: “Duna mi mi kosnan”, pa despues e dosnan aki kuminsá bringa. Den sala di korte Crump a deklará ku el a dal Alex ku e pistol ku e tabatin den su man na esaki su kara pa despues sera su wowo i tira dirigí riba Alex, kende a dal abou morto na e mesun sitio.

Durante tratamentu di e kaso a bolbe sosodé un tipo di aktitut ku mas i mas ta manifestá serka hóbennan ku haña nan ku hustisia, nan no ta papia i ta sinta den korte komo sifuera nan atenshon no tei at all! Remarkabel ta e echo ku wes señora mr. M.C.B Hubben a puntra e akusado si e ta sinti ku mester tene un pousa kòrtiku. Demasiado biaha durante tratamentu di e kaso, Crump simplemente tabata drumi ku su kara riba e mesa su dilanti i ta manera e no tin atenshon mes pa loke ta pasando, siendo tur loke ta pasando tin di haber kuné. Mas aleu a bini padilanti tambe ku Crump lo tin e malesa ADHD. Ta trata akí di un malesa ku tin di haber ku trastornu di komportashon. Anto tambe ku Crump klaramente tin un atraso den su desaroyo, segun ekspertonan sikiater i sikólogo. Tratamentu di e kaso riba kontenido a tuma lugá dia 12 di yüni último i korte a keda pa duna sentensia di 1 di yüli. Fiskal señora mr. K. Hara a demandá un kastigu di prizòn di 12 aña pa Crump.

E kastigu ku wes a kondená Crump finalmente na dje ta den e kategoria hubenil, esta 2 aña di medida di doló of sea medida di kastigu den un instituto hubenil Justitiële Jeugdinrichting Curaçao (JJIC). Ademas Crump mester paga e suma di Cg 22.838 na daño i perwisio.