Kon supervisornan bankario por reakshoná mas lihe den un panorama finansiero birando mas kompliká

WILLEMSTAD – Supervisornan bankario, reguladónan i ekspertonan den sektor finansiero di Karibe a reuní resientemente den e di 43 konferensha anual di Caribbean Group of Banking Supervisors ku a keda organisá pa Banko Sentral di Kòrsou i St.Maarten.

E aña akí ta di dos biaha ku Kòrsou ta anfitrion di e konferensha anual di CGBS, despues di e promé biaha na 2010. E tema “Resilience and Innovation: Reimagining Supervision Amid Artificial Intelligence Risks, Data Protection and Systemic Uncertainty” di e aña akí a eksplorá kon outoridatnan di supervishon por reakshoná di un manera efektivo na un panorama finansiero ku ta birando mas kompliká i ku ta evolushoná rápidamente. Den su palabranan di apertura, Presidente di CBCS, Richard Doornbosch, a enfatisá e importansia di koperashon regional i supervishon adaptivo pa por enfrentá riesgonan emergente. Durante e konferensha, diferente oradónan prinsipal a kompartí nan perspektiva riba tópikonan manera inteligensia artifisial, seguridat sibernétiko, resilensia operashonal, riesgonan finansiero relashoná ku klima, protekshon di dato, inklushon finansiero i modernisashon di kuadronan di supervishon. E oradónan a representá institushonnan manera Banko Sentral di Belize, Bank of Jamaica, Cayman Islands Monetary Authority (CIMA), Banko Sentral di Bahamas, Alliance for Financial Inclusion di e region di Latino Amérika i Karibe, SQL Power Group (Irlanda), Bermuda Monetary Authority, Insurance and Pensions Advisory Board di Toronto Centre (Canada), i Eastern Caribbean Central Bank (ECCB). E programa a inkluí presentashonnan i diskushonnan den pènel riba e tópikonan akí, ofresiendo oportunidat pa interkambio di konosementu i diálogo entre partisipantenan. Un tema sentral durante e konferensha tabata e impakto kresiente di inteligensia artifisial riba e sektor finansiero i e ròl di supervisornan den e balansa entre inovashon i un maneho sólido di riesgo.