WILLEMSTAD— 4 akusashon tabatin kontra di e komersiante chines FENG, pero di tur 4 akusashon FENG a sali liber, di akuerdo ku e sentensia di korte diktá riba 5 di ougùstùs 2026. Tabata trata di akusashonnan manera:

– Labamentu di plaka, kombiná ku ‘underground banking’ durante e periodo 1 di ougùstùs 2011 pa 15 di ougùstùs 2017.

– Keda sin kumpli ku su deber di hasi aangifte na ofisina di impuesto pa entradanan risibí durante e periodo 1 di yanüari 2012 pa 1 di yanüari 2019.

– Falta ku e ordenansa ku ta regla supervishon di ‘Bank- en Kredietwezen’.

– Violashon di e ordenansa Nashonal riba Supervishon di Ofisinanan di Transakshon di Plaka.

Ampliamente e kaso aki a keda tratá den sala di korte djabièrnè 31 di yüli riba dudanan serio ku Ministerio Públiko a ekspresá riba orígen di e rikesa i sumanan kuantioso ku un komersiante chines di fam FENG ta disponé di dje, ya ku no tin aklarashonnan konvinsente pa splika di unda e rikesa akí a sali. Un lista largu di terenonan na Kòrsou Ministerio Públiko a presentá kuné kaminda FENG lo ta doño, pero ku no por splika di unda tur e plakanan ei a sali pa e por a bira doño i kon tur kos a bai. Enfin, e kabayero aki, ku e fam FENG (un di e magnatenan grandi di plaka na Kòrsou den e komunidat chines aki) finalmente di parti di Ministerio Públiko lo no keda persiguí.

Ministerio Públiko ya durante tratamentu di e kaso a indiká ku investigashonnan hasí no a duna pruebanan kontundente. E tim di investigashon di Ministerio Públiko a bin reis riba e hecho ku gran mayoria di e testigunan ta biba na China i ta for djei transakshonnan finansiero a keda hasi pa Kòrsou for di kuentanan di banko na China.

E investigashon aki, esta Avior, tabata dirigí na kuminsamentu riba e akusado prinsipal Ching, ku kende Ministerio Públiko ya a yega na un areglo, pero FENG kende tambe a bira parti di e investigashon, no ta bai keda pèrsigui mas. Hopi tempu a pasa, tur sorto di investigashon a keda hasí, pero sin resultado, maske a kana un trayekto asina largu, skuchando tur sorto di testigu, someté bou di proseso i proseduranan chines.

Na kuminsamentu di e investigashon e akusado FENG a hasi uzo di su derechi di keda ketu na aprel i ougùstùs di aña 2018. Tabata na 4 di yüni 2029 numa ku FENG a bira dispuesto pa duna algun deklarashon. El a bisa ku fayesementu di su tata, el a tuma tur propiedat over, loke ta enserá tantu edifisionan komo sumanan kuantioso di plaka. Ta trata aki tantu di edifisionan na Kòrsou komo na China. Na China (4 edifisio, 17 apartamento i 2 kas). FENG su tata defuntu a regla kumpramentu di edifisio den Cubaweg, Klein Zuurzak i Kaya Jacob Posner. Ainda tin e parselanan na Beurs i Kaya Ma Pieternella ku a keda poné riba FENG su nòmber. Si tabatin labamentu di plaka di parti di su tata, FENG no sa apsolutamente nada di esei.

A bini padilanti durante tratamentu di e kaso aki den sala di korte ku Ministerio Públiko a kana hinter un kaminda di krus, inkluso ku sierto investigashonnan hasí na China, pero sin resultado. Ministerio Públiko no a logra establesé ku FENG ta totalmente fuera di lei i ku enbèrdat a hasi kosnan robes pa por a bira riku. Maske no tin pruebanan palpabel Ministerio Públiko ta sospechá ku kosnan no a kana korekto, komo tal a menshoná ‘underground banking’, e kaso di e barku ‘Summerbliss’ ku ta relashoná ku ladronisia di baranan di oro tambe ta relashoná ku plakanan ku ta lora den e gremio aki. Enfin segun Ministerio Públiko tin un holó di krímen i otro iregularidat ta bai kompañá ku hinter e asuntu aki. Pero resultadonan di e investigashonnan hasí no a duna e resultadonan ku Ministerio Públiko a spera.

E kabayero di fam FENG, a insistí ku su herensia ta bin for di su tata, kende ya no ta na bida mas. E tata di FENG, segun loke a keda tresé padilanti tabata un komersiante ku tabata doño di un negoshi di palu na China ku tabata masha eksitoso mes. Pero na sierto momento a disidí di bende e negoshi aki i sali for di China bini Kòrsou ku biyetenan di plaka di plak na su kurpa. Asina ei e tata a drenta Kòrsou. Pues ta e persona aki ta e esun ku a akumulá e rikesa ku despues na Kòrsou a sigui traha i generá mas kapital. E akusado FENG, kende aktualmente ta e heredero a deklará ku tempu ku su tata tabatin e negoshi i ku esaki a drenta Kòrsou ku e plakanan di plak na su kurpa, e tabata un mucha di apénas 11 aña edat, pues e no por responsabilisá kon kosnan a bai. Abogado señora mr. Marije Vaders a keda enkargá ku e defensa di FENG den sala di korte E abogado a pasa maestralmente riba kantidat di detayenan pa mustra tantu riba inkonsistensia komo inkompetensia di parti di Ministerio Públiko den tur e asuntunan aki. Segun e abogado klaramente tin faltamentu ku prinsipionan di igualdat di manera ku ta parse ku tin tendensianan diskriminatorio den e totalidat ta hunga un ròl.

Enfin, wes señora mr. E.J. van Rijssen, kende a dikta sentensia dia 5 di ougùstùs 2026 a apsolbé FENG di tur 4 akusashon. Ta nifiká ku persekushonnan kontra di e komersiante di fam FENG di tal forma a kita totalmente for di mesa.