Den kuadro di kasonan kaminda tabatin violashon di e lei di opium, wes mr. J. van der Groen djaluna 30 di mart 2026, finalmente a sentensiá e siudadano S. Lourens (60 aña di edat) na un kastigu di prizon 10 luna di kua 5 luna kondishonal. Masha remarkabel ta ku ni e akusado Lourens, ni su abogado mr. E. Kleist no tabata presente durante tratamentu di e kaso. 

E akusashon kontra di Lourens tabata ku dia 21 di òktober 2024 el a entregá na pòst un pakete pa bai Ulanda. Despues di a keda di skèn duana a deskubrí ku aki ta trata di 346 gram di kokaina. Na momento ku polisnan a bai pa detené esun responsabel, esta Lourens riba dia 24 di novèmber, el a deklará ku ta un tal ‘Andy’ el a hasi un fabor di pone e pakete riba pòst, pero mesora el a ninga di tabata sa ku aki ta trata di droga.

Fiskal señora mr. K. Hara, kende na nòmber di Ministerio Públiko a hiba palabra, a splika ku e droga tabata skondí den souvernir i pa esei e fiskal a demandá un kastigu di prizòn di 12 luna di kua 6 luna kondishonal, mará na un periodo di prueba di 3 aña. Fiskal a deklará di ta preferá pa e akusado Lourens tabata presente pa por a hasié algun pregunta hopi esensial i di tal manera haña mas klarifikashon riba e akusado aki su sirkunstansia. Wes mr. J. van der Groen a konstatá ku e akusashon kontra di Lourens ta legalmente i konvinsentemente probá, pues e akusado aki meresé kastigu, pero a yega na e kondena di 10 luna di kua 5 luna kondishonal.