Update: Detenshon di 2 hòmber i un muhé relashoná ku asesinato hóben(16)

Update:

ORANJESTAD— Un informe di último momentu for di Aruba ta indiká ku outoridatnan a detené 3 sospechoso relashoná ku e kaso di tiramentu fatal ku a tuma lugá ayera, djarason anochi na Santa Cruz. Manera indiká anteriormente, e hóben di apénas 16 aña Rayson E. Kelly a pèrdè su bida.

Tim di reshèrshi a traha inkansablemente i a pone man riba tres sospechoso ku a tuma lugá na stadion Nadi Croes di Santa Cruz. Esnan detené ta dos hende hòmber kendenan ta ; W.R.D.T di 23 aña i A.K.M. di 32 aña i e hende muhé J.M.L.G. di 31 aña. Tur tres ta nase na Aruba.

Polis ta indiká ku no ta deskartá ku lo tin mas detenshon pa ku e kaso aki.

Hóben (16) a fayesé den asesinato na Aruba

ORANJESTAD— Komunidat di Aruba a haña otro gòlpi fuerte na momentu ku un hóben di apénas 16 aña a pèrdè su bida den un kaso di tiramentu. E informashon inisial ta indiká ku djarason anochi pa mas o ménos 9:55 sentral di polis a risibí informashon di un kaso di tiramentu ku a tuma lugá riba e lugá di parker di stadion Nadi Croes Angela na Santa Cruz. Mesora a manda un patruya i ambulans na e sitio.

Na momentu ku polis a yega na e sitio a topa ku e mucha hòmber riba e lugá di parker ku un tiru na su kurpa i no ta reakshonando. Ambulans a presentá i a duna asistensia médiko na e víktima i a transport’é ku urgensia máksimo pa hospital. Unidatnan di polis a sera diferente parti di kaminda pa asina ambulans por a yega mas lihé ku ta posibel na hospital.

E investigashon inisial a mustra ku e víktima lo tabata riba un bròmer huntu ku un otro persona. Pero tabatin un outo ku 3 hòmber aden, i esaki lo a tira riba nan i e víktima a keda alkansá pa e tiru. Departamentu di reshèrshi i departamentu di BFTO a presentá na e sitio pa asina hasi nan investigashon. A notifiká departamentu di slachtofferhulp tambe.

Mas lat a drenta informashon ku e víktima, Rayshon E. Kelly nase na Aruba 1 òktober 2009 a fayesé.

Kuerpo polisial Aruba ta pidi personanan ku sa algu òf a wak algu pa yama e tiplijn di polis ku ta 11141. Bo ta keda anónimo.