Promé yudansa humanitario di Merka pa Cuba

HAVANA, CUBA— Yudansa humanitario a kuminsá yega Cuba for di Merka. Esaki ta marka e promé bia ku Merka ta manda yudansa humanitario pa Havana, Cuba bou di e inisiativa nobo ku ta kosta $ 100.000.000. Ta trata aki di un koperashon poko komun di koperashon entre e dos paisnan, apesar di e tenshonnan polítiko i sanshonnan ekonómiko ku ta sigui eksistí.

E promé buelo ku yudansa a sali for di Miami, ku paketenan prepará di kuminda i produkto di higiena pa mas o ménos 700 famia kubano. E karga ta forma e promé fase di un programa humanitario mas amplio, anunsiá mas tempran e aña akí pa e Sekretario di Estado di Merikano, Marco Rubio. Meta di e programa ta pa duna yudansa direktamente na kubanonan ku ta enfrentando un nesesidat grave di alimento, remedi i otro produkto esensial.

Kontrali na e forma tradishonal di yudansa entre gobièrnunan, funshonarionan merikano a bisa ku lo repartí e produktonan via e organishon Catholic Relief Services (CRS), den kolaborashon ku iglesia katóliko i Caritas Cuba, esei ta un ret di organisashonnan karitativo katóliko ku ta aktivo rònt e isla. Washington a bisa ku e método aki su intenshon ta pa garantisá ku e yudansa ta yega direktamente na famianan vulnerabel, i alabes prevení ku gobièrnu kubano ta desviá e produktonan.

E inisiativa humanitario ta bin na un momento ku Cuba ta pasando un di su krísisnan ekonómiko mas difísil di e último dékadanan. E isla ta enfrentando un falta persistente di kuminda, kombustibel i remedi, interupshonnan prolongá di elektrisidat i inflashon kresiente. E kondishonnan aki a hasi bida kada bia mas difísil pa miónes di kubano. Organisashonnan humanitario a atvertí ku hopi kas ta luchando pa haña akseso na nesesidatnan básiko.

Ounke e entrega di e yudansa humanitario ta representá un momento di kontakto poko komun entre Washington i Havana, esaki no ta indiká un kambio mas amplio den maneho di Merka. Na mes momento, e gobièrnu di Trump a intensifiká sanshonnan dirigí kontra e sektornan militar, di inteligensia i turismo di Cuba. Di e manera aki, e ta mantené preshon riba e gobièrnu komunista, miéntras ku e ta enfatisá ku su sosten humanitario ta dirigí solamente na pueblo kubano.

Funshonarionan a bisa ku nan ta spera ku despues di e promé karga aki, otro vuelonan humanitario lo sigui, segun ku e programa ta amplia. Catholic Relief Services a indiká ku finalmente e pakete di fondo mas amplio lo sostené repartishon di kuminda di emergensia, produkto di higiena i otro artíkulonan esensial pa kas, na algun shen mil di kubano rònt e pais.