Gilbert Martina ta baha komo presidente di Federashon Futbòl Kòrsou

WILLEMSTAD—Den un informe ofisial di e Federashon di Futbòl di Kòrsou (FFK) a anunsiá ku e aktual presidente di e organisashon sr. Gilbert Martina ta baha komo presidente di FFK. Manera e informá ta indiká, e direktiva lo deliberá den su seno pa atendé nombramentu di un presidente nobo.

E informe ta indiká ku entrante 21 di yüli 2026, Gilbert Martina a tuma e desishon di baha komo presidente di Federashon di Futbòl Kòrsou pa motibu di salú. Durante di un kontròl médiko rutinario ku a el a hasi poko tempu pasá, a konstatá ku Martina tin kanser di prostat. Esaki ta den un fase tempran. Siguiendo e konseho di su tim médiko, e lo someté su mes na un operashon. Pa e rason aki el a disidí di baha for di su funshon pa por dediká su atenshon kompletu na su salú i proseso di rekuperashon.

Mirando e magnitut di e responsabilidatnan ku tabata bin huntu ku e preparashon pa i durante di partisipashon di Kòrsou na FIFA World Cup 2026, Martina a skohe pa no hasi su diagnóstiko públiko mas promé. E desishon aki a keda tumá den interes di federashon, e selekshon nashonal i di Kòrsou. Di e forma aki tur atenshon por a keda dirigí riba Kòrsou su partisipashon históriko, pa promé biaha, na un FIFA World Cup.

Mirando bèk riba su periodo komo presidente, Gilbert a ekspresá su gradisimentu sinsero na miembronan di FFK pa e konfiansa ku nan a dun’é na ora ku nan a eligié komo presidente aprel 2025.

“Tabata un gran honor pa mi por a kontribuí na un trayekto ku finalmente a hiba nos pais na un lugá kaminda nos no tabata nunka promé: Mundial di FIFA. E logro históriko aki ta resultado di un vishon di largu plaso i di esfuersonan konhunto di hopi hende dediká ku a traha na e meta aki for di aña 2002. E klasifikashon pa FIFA World Cup a pone Kòrsou, un pais chikí na tamaño, pero ku un kurason grandi i un pashon inmenso, riba mapa mundial di futbòl. Ta un prestashon di kua nos komunidat kompletu, ku tur nos derecho, por sinti nos orguyoso.”

“Mi ta hopi gradisí na tur e miembronan di FFK pa e konfiansa ku nan a duna mi komo presidente. Tabata un privilegio pa mi por a ehersé e funshon aki ku dedikashon i kompromiso. Awor, sin embargo, mi salú mester tuma promé lugá i lo mi dediká mi mes kompletamente na mi rekuperashon.

Direktiva di FFK ta ekspresá su apresio sinsero na Sr. Martina pa su liderazgo dediká, su kompromiso i su kontribushon balioso na e desaroyo kontinuo di futbòl na Kòrsou. Durante su presidensia, el a guiá e federashon den un di e períodonan mas signifikativo den su historia, ku komo punto kulminante e klasifikashon históriko pa i partisipashon di Kòrsou na FIFA World Cup 2026.

“Na nòmber di henter famia di futbòl di Kòrsou, nos ta gradisí Gilbert pa tur su esfuerso i nos ta dese’é un pronto rekuperashon, kompletu i próspero,” asina visepresidente Fabi Constansia a bisa.

Direktiva di FFK lo determiná, den konsulta ku e miembronan di e federashon, e prosedura pa nombramentu di un presidente nobo. Te ku e siguiente Reunion General di Miembronan, e visepresidente lo aktua komo presidente interino. E trabounan di e Federashon, inkluí e kompetensianan nashonal, e aktividatnan di e selekshonnan nashonal i e obligashonnan internashonal di FFK, lo kontinuá durante e periodo aki sin interupshon.