WILLEMSTAD – Un siudadano di orígen venezolano, kende tin e fam Cuanipa Chirinos i ta 37 aña di edat, a hañé den un kaso sumamente agresivo i violento dia 16 di yüni 2025. Ta trata akí di un bringamentu ku a surgi riba e fecha menshoná, kaminda Guanipa Chirinos a kibra bòter di serbes pa defendé su mes kontra di 4 hòmber ku tabata batié ku skòp.

E suseso akí a tuma lugá na UN diskoteka riba Winston Churchillweg ‘The Beer Station’, konosí komo un sitio kaminda prinsipalmente latino amerikanonan sa akudí, pero ku sa kaba den bringamentu despues ku bishitantenan a tuma bebida alkohóliko di mas. E víktima den e kaso akí tabata un otro siudadano venezolano di fam Valencia Ordoñez, kende a keda ku heridanan na vários parti di su kurpa, esta patras di kabes, na garganta i skouder, propiná pa Guanipa Chirinos.

Tratamentu final di e kaso akí den sala di korte tabata dia 22 di aprel 2026. Pa su defensa e akusado Guanipa Chirinos tabatin abogado mr. S.F. Osepa, miéntras ku na nòmber di Ministerio Públiko a hiba palabra mr. P. Borst. E wes ku a dirigí e seshon tabata mr. N.K. Engelbrecht.

Ministerio Públiko a demandá un kastigu di prizòn di 24 luna, kitando e periodo ku e akusado akí a pasa den aresto preventivo, mas un suma di Cg 6.633,25 na daño i perwisio. Durante tratamentu di e kaso a para ampliamente ketu na e suseso kaminda mas persona tabata envolví. E panorama mas kompletu ta trese na klaridat ku tabatin un konfrontashon ku a kondusí na un bringamentu entre Guanipa Chirinos i un otro persona, despues korementu tras di Guanipa Chirinos, kende a kai abou na suela i a keda maltratá ku skòp i slanan di un grupo di 4 persona. E akusado Guanipa Chirinos, siendo den e situashon sumamente problemátiko akí a kue bòter di serbes na suela i kuminsá zuai riba e agresornan, entre kua Valencia Ordonez ku a keda mal heridá.

Tambe a bini padilanti ku tabatin un diskushon promé riba dansvlur di e diskoteka. Ta netamente na e sitio ei e konflikto a start, pero ku intervenshon di doño di e lokalidat i vigilansia a laga saka esun mas molestioso i burachi, esta Valencia Ordoñez, pone pafó. Despues ku Guanipa Chirinos tambe a sali for di e diskoteka pa regresá kas, el a tuma nota ku tabata bringando ku su amigu i akí Guanipa Chirinos a sali na defensa di su amigu i a logra para e pelea. Djei Guanipa Chirinos kier a bandoná e sitio, pero un grupo di persona a sigui su tras. Na sierto momento Guanipa Chirinos a trompeká i kai abou na suela. E grupo di persona ku tabata persiguié a kuminsá batié ku skòp. Ademas a bini padilanti ku e víktima tabata hopi molestioso i klaramente bou di su awa.

Wes mr. Engelbrecht skuchunado tur argumento, tantu di parti di Ministerio Públiko komo abogado mr. S.F. Osepa i su kliente Guanipa Chirinos, a tuma tempu pa studia e kaso pa dia 13 di mei último dikta sentensia. E veredíkto a sali na fabor di Guanipa Chirinos. Wes a husga ku tin komprenshon pa  e komportashon di e akusado Guanipa Chirinos i a lague liber di tur akusashon kontra dje. Tambe wes a disidí ku e demanda pa daño i perwisio di parti di e akusado ta no atmisibel, komo tal no tin ningun base hurídiko, pasobra e falta pa loke a sosodé pa gran parti ta serka e víktima mes.