WILLEMSTAD –

Djadumingu mainta di 17 di mei, Sentro Operashonal Marítimo di Wardakosta a risibí un yamada relashoná ku un kaso ku tabatin mester di atenshon di Wardakosta na Seru di Kristòfel.

Personal di parke Nashonal di Kristòfel a tuma nota di un persona ku a lástima su mes riba e seru. Ta trata di un hende muhé turista di 28 aña di edat ku nashonalidat hulandes ku a lastimá su pia na momento ku e la bai subi Seru di Kristòfel. E persona a lastimá su mes di tal manera ku e no ta por a kana riba su mes forsa. Inmediatamente a alerta personal di e helikòpter di Wardakosta pa sali den direkshon di Seru di Kristòfel. Danki na yudansa di personanan ku tambe tabata subiendo e seru a logra lokalisá e persona rápidamente. Despues di a reskatá e persona, a hib’é Hato kaminda personal di ambulans tabata presente pa transportá e persona pa Curaçao Medical Center (CMC).

Sentro Marítimo Operashonal di Wardakosta, a risibí un yamada riba djasabra 16 di mei for di Kuerpo Polisial pidiendo asistensia ku búskeda di un persona ku posiblemente ta pèrdí den mondi.  Ta trata di un turista hende muhé ku nashonalidat kanades di 70 aña di edat ku a bai kana den besindario di Seru Bientu (Banda Abou) pero e no a bin bèk.  Su kasa ku tambe ta un turista kanades, inmediatamente a tuma kontakto ku Kuerpo Polisial di Kòrsou. Miembronan di Kuerpo Polisial a keda konstantemente den komunikashon ku e kasa durante di e kaso. 

Inmediatamente a alerta personal di e helikòpter di Wardakosta pa sali den direkshon di Seru Bientu pa asina asistí durante di e búskeda. E avion tipo Dash-8 di Wardakosta tambe a duna asistensia i a kontinuá ku e búskeda te ora nan lat di anochi.

Su siguiente mainta di djadumingu 17 di mei, a bolbe lanta e helikòpter nèt promé ku solo a sali pa asina kontinuá ku e búskeda.  Den ora nan di mainta a logra di lokalisá e persona den área di Lagun.  

Personal di e helikòpter a logra di reskatá e persona i a hiba e te na Hato kaminda personal di ambulans tabata presente i a konstatá ku e señora tabata den bon kondishon. Miembronan di Kuerpo Polisial a sòru di hiba e personanan na nan lugá di estadia.