WILLEMSTAD— Apénas 21 aña di edat e homber C. Constancia tin, ku ya el a aparesé den sala di korte dia 13 di mei último, akusá di un total di 11 akto kastigabel ku el a kometé. Remarkabel ta ku C.C tin 3 otro siudadano ku a kolaborá kuné, pero e no kier a menshoná nan nòmber.

Pa kuminsa el a hòrta dia 24 di òktober 2025 un ‘stofzuiger’ marka Karcher, un aparato di preshon pa limpiesa tambe di marka Karcher i un lus di outo Kia, Rio.

Dia 17 di òktober 2025 el a kibra drenta den un vehíkulo ku e plachi di number V 76-85 pa bai ku mashin pa skruf, mashin di zag, otro zag mas, mashin di bor, martin pa kibra muraya, ‘slijptol’, 2 kaha di hèrmènt, 2 klèm, ‘stofzuiger’ di marka Makita.

Dia 5 di ougùstùs 2025 e tabata metí den un ladronisia na un kas situá na Sabana Westpunt. Akí atrobe el a hòrta vários kaha di hèrmènt, un kaha koló hel ku ta kontené drill bits, un kaha ku ta kontene disc brake, ‘stofzuiger’, sets di sockets, lampi pretu ku hel, un kaha ku djèk.

Dia 7 di yüli 2025 el a hòrta den un kas na Kaya Roebelini. Akí el a bai ku 3 mashin di bor di e markanan Black & Decker i Bosch, mashin di zag, Jigsaw, mashin di skür marka Black & Decker, ‘stofzuiger’, mashin di skaf, mas mashin pa skür.

Dia 11 di yüni 2025 kiebro den un kas na Kaya Yanchi Boskaljon. Aki el a bai ku vários kaha di hèrmènt, 1 generator (Hybrid Elite, 1 bòter di gas.

Dia 25 di yüli 2025 el a hòrta for di 1 outo ku tabata stashoná den un kurá na Jan Kok, bai ku 3 mashin di bor, 3 mashin pa skruf, zag pa saka figura, 2 ‘slijptol’, mashin pa zag, 2 ‘breekhamer’ elektriko, tas ku hèrmènt, otro tas mas ku hèrmènt, vários kabel, bleki ku kontenido pa spuit,, sockets.

Dia 4 di ougùstùs 2025, ladronisia den un kas na Fontein. Aki el a bai ku diferente hèrmènt, generator, mashin elektriko pa kòrta yerba, kompresor i aparato pa las, ekipo pa frase, 2 mashin pa skür, sinlender di gas, aparato pa klaba, ‘decoupeerzaag’ mashin pa bor.

Enfin tambe C.C tin riba su nòmber, ladronisianan grandi kometé dia 23 di yüni 2025 na Lagun i otro ladronisia den un outo na Lagun dia 26 di ougùstùs 2025, 12 di yüni 2025 ladronisia den un kas na Sabana Westpunt, 1 di sèptèmber 2025 ladronisia di outo ku e plachi di number X37-36 ku vários hèrmènt den e vehíkulo. Den tur e kasonan akí tin piesanan sumamente karu inkluí, prinsipalmente pa konstrukshon.

Hopi remarkabel ta e hecho ku e akusado akí, esta C.C, tabata sumamente skars na palabra durante tratamentu di su kaso den korte. Kasi ta su abogado señora mr. Tromp so a hiba palabra.

Fiskal señora mr. Keller na nòmber di Ministerio Públiko a demandá un kastigu di prizòn di 36 luna di kua 12 luna kondishonal ku un periodo di prueba di 2 aña, mará na guia di Reclassering pero wes señora mr, H.R. Bracht finalmente a kondená e akusado C.C na un kastigu di 30 luna di prizòn di kua 12 luna kondishonal i e demas kondishonnan ku Minsierio Públiko a argumentá.