WILLEMSTAD— Ministerio Públiko ta enfatisá ku siudadanonan ta permití pa protehá nan propiedat, pero ku tin límitenan. Motibu di esaki ta un insidente resien den kua un kunukero supuestamente a maltratá un hòmber severamente. E hòmber aki ta sospechá di a hòrta un kabritu.

Relashoná ku e kaso aki, tantu e kunukero komo e supuesto ladron di bestia a keda detené. Ministerio Públiko ta komprondé ku ladronisia di bestia por trese sintimentunan di rabia, frustrashon i impotensia, speshalmente ora un hende ke protehá su propiedat. Hasta ora ku yama polis i nan no por presentá mesora na e sitio, e prinsipio ta keda ku siudadanonan no mag di tuma lei den nan propio man.

Defendé propiedat ta permití bou di sierto sirkunstansianan, pero e uso di forsa mester ta nesesario, rasonabel i proporshonal. Ora forsa ta desproporshonal i un hende keda agredí severamente, esaki por konstituí un ofensa penal. Agreshon ta un krímen i por tin konsekuenshanan penal. Ministerio Públiko ta hasi un yamada na siudadanonan pa tuma kontakto ku polis si nan ta sospechá ladronisia òf otro delitonan penal, pa sigurá pruebanan kaminda ta posibel, i pa warda yegada di polis. E estado di derecho ta rekerí ku ta rastrea sospechoso, persiguí i husga di akuerdo ku lei.