Avion Air Canada a dal den vehíkulo brantwer na airopuerto New York

NEW YORK – Dos piloto a muri I 41 persona herida den un aksidente ku a tuma lugá djadumingu anochi na e airopuerto La Guardia di New York. E avion di Air Canada tabata bahando riba e pista I na dado momentu a topa ku un vehíkulo di brantwer di e airopuerto ku tabata na kaminda pa asistí un avion di United Airlines. E avion di Air Canada tabatin un velosidat di 39km/ora na momentu di e impakto ku e vehíkulo di brantwer.

E kompania Jazz Aviation tabata operando e avion di Air Canada riba un buelo 8646 ku a sali for di Montreal pa New York ku 72 pasahero I kuater miembro di kabina na bordo. Outoridatnan a konfirmá ku tantu e piloto komo e ko-piloto a muri den e aksidente. E aksidente aki ta tuma lugá na momentu ku aviashon merikano ta konfrontando eskases serio di kontroladó di tráfiko, esaki ta debí pa gran parti na e desishon di gobièrnu merikano pa sera institutonan parsialmente. E asina yama ‘partial government shutdown’ ta krea filanan largu na momentu di kontrol na airopuertonan merikano, buelonan ku ta sali lat i otro problemanan di seguridat.

32 di e 41 personanan ku a sufri leshon por a bai kas despues di tratamentu. Tin 9 persona ainda ku ta den hospital debí na leshonnan mas severo. Outoridatnan di aviashon a informá ku e buelo di Air Canada tabatin indikashon positivo (clearance) pa aterisá na La Guardia, pero despues ta resultá ku e vehíkulo di brantwer tambe a haña indikashon positivo pa subi e pista.