Banko Sentral ku ‘Siman di Sèn’ na skolnan básiko

WILLEMSTAD –  Banko Sentral di Korsou i St.Maarten(CBCS) a lansa e proyekto edukativo “Siman di Sèn” na skolnan básiko na Kòrsou i Sint Maarten e siman aki. Ku e inisiativa aki, CBCS tin komo meta pa hasi muchanan konsiente di e balor di sèn, spar, i hasi eskohonan finansiero na un edat yòn kaba.

Durante e siman aki, tur skol básiko lo risibí un kantidat di kaha di plaka ku ta kontené biyete y monedanan fiktisio di e florin karibense. Maestronan por usa e kahanan di sèn aki durante lèsnan di matemátika pa trata tópikonan di sèn i finansiero na un manera di wega i práktiko. E apertura di Siman di Sèn a tuma lugá na Sint Maarten na Oranje Primary School. Einan, direktor interino di CBCS Sint Maarten Dwayne President i minister di Enseñansa Melissa Gumbs konhuntamente a duna charla di invitado na e muchanan di grupo 5 na e skol. Minister di Finansa Marinka Gumbs i empleado di CBCS Ghyslaine Rollocks-Petrona tambe a kontribuí na e inisio ku un charla di invitado na Dr. Martin Luther King Jr. Primary School. Durante e charlanan di invitado aki, studiantenan ta siña mas di e florin karibense nobo, i maneho responsabel di sèn ta wòrdu diskutí na un manera interaktivo. Na Kòrsou tambe a habri e Siman di Sèn di un manera festivo ku un charla di invitado di presidente di CBCS Richard Doornbosch huntu ku promé minister Gilmar Pisas i tambe empleado di CBCS Shekinah Dare na Kolegio San Hosé na Barber. E klousura di e siman ta tuma lugá djabièrnè 27 di mart na Johan van Walbeeckschool, kaminda minister di Enseñansa Sithree van Heydoorn, huntu ku direktor ehekutivo di CBCS Leila Matroos-Lasten, lo duna e charla di invitado final. Banda di e charlanan di apertura i klousura, charlanan di invitado lo wòrdu duná na alumnonan di grupo 5 dor di personal di CBCS na vários skol na Sint Maarten i Kòrsou mas lat e siman aki. E skolnan básiko ku anteriormente a wòrdu informá tokante e proyekto a reakshoná partikularmente entusiasmá riba e inisiativa.