Aruba tambe ku akshon pa entrega arma di kandela ilegal

Santa Cruz, ARUBA: Kuerpo Polisial Aruba konhuntamente ku Ministerio Públiko ta anunsiá ku lo kuminsá ku akshon Nashonal pa entrega bo arma di kandela ilegal.

E akshon ta unu interinsular ku ta regarda e Kuerponan Polisial di Caribe Hulandes den koperashon ku e Kolegio di Hefenan di Kuerpo (college van korpschefs).

E inisiativa aki ta un kolaborashon di e organisashonnan di Caribe Hulandes ku koperashon di Ministerionan Públiko di Aruba, Kòrsou, Boneiru, Saba, Sint Eustatius y Sint Maarten.

Kuerpo Polisial Aruba y Ministerio Públiko kier enfatisá ku e uzo di arma di kandela ilegal ta hiba na insidentenan serio. Poseshon di arma di kandela ilegal ta trese un sentimentu di inseguridat den komunidat. E ta hiba na mas violensia y mas inseguridat.

Pa lei si topabu ku un arma di kandela ilegal den bo poseshon bo ta keda detené y sentensiá pa un hues. Tin hende ku ta haña sentensia pa algun aña di prisòn djis pa poseshon di arma. Sinembargo, por sosodé ku e persona ku tin un arma di kandela ilegal no kier esaki mas, pero no kier entrega esaki na polis tampoko pa miedu di keda detené y ku e mester legitimá su mes.

Pa e motibu aki ta tene un akshon pa entrega bo arma di kandela ilegal. E akshon ta kuminsá desde 24 mart 2026 te ku 24 aprel 2026 na unda lo por hasi uzo di e kònteiner blou pariba di brùg. E kònteiner blou lo ta esun  situá banda di warda di polis San Nikolas. Pa loke ta trata pabou di brùg lo anunsiá e lugá den e próksimo dianan.

Personanan ku entrega un arma di kandela ilegal den e periodo aki NO lo keda persiguí penalmente. Tambe bo ta keda anónimo. E ta  konta tambe pa balanan y piesanan di arma di kandela.

Despues di e periodo aki, si polis haña bu ku e arma di kandela ilegal ta persiguí bu penalmente!

Kuerpo Polisial Aruba ta pidi pa entrega e arma di kandela ilegal òf e piesanan paketá, pa evitá aksidente.