Aruba a registrá e di 7 morto  den tráfiko pa 2026

ORANJESTAD— Aruba a registrá otro kaso lamentabel. Ta trata di un kaso ku a tuma lugá djadumingu 14 di yüni, kasi 6’or di mainta na Sabana Liber. Aki un bròmer tabata embolbí den un aksidente, ku ainda outoridatnan mester kaba di investigá.

Sentral a manda patruya polisial i ambulans pa e lugá. Na yegada di e promé patruya, a bin topa ku un hende hòmber den un situashon hopi grave.

Informashon risibi na e sitio a mustra ku probablemente e bròmer lo a bai dal den asera. Ambulans a yega na e sitio i mesora a duna e motosiklista (víktima) maskulino promé asistensia, pa despues a stabilis’e i transport’é ku urgensia pa hospital.

Awe djamars mèrdia sentral di polis a risibí informashon di hospital ku e situashon di e víktima a bira kritiko. Pa 1:17 pm dòkter a konstatá morto di e víktima Johan Fernando Vasquez Lopez  nase na Colombia dia 10 di mart 1993. (33 aña). Esaki ta bira e di 7 morto den tráfiko pa aña 2026.