Abusu di poder, violashon di lei i destrukshon funshonario públiko den GMN

Frakshon MAN-PIN ta denunsia

WILLEMSTAD – Tin un patronchi sistemátiko di abusu di poder, violashon di lei i destrukshon di funshonarionan públiko den ministerio di Salubridat públiko, Medio Ambiente i Naturalesa. E dos sentensianan di “Gerecht in Amtenarenzaken” (GAZ) di mei 2026 ta konfirmá loke mayoria hende sa hopi tempu kaba, esta ku gobièrnu a kita hende for di nan trabou pa motibunan fabriká, sin base, sin hustisia, sin lei ni konsenshi. Esaki ta e konklushon di mr. Suzanne Camelia-Römer na nòmber di e frakshon di MAN-PIN.

Manera ta ampliamente konosí, korte a anulá kompletamente e retiro di sr. Dwarkasing i sra. Nicolina, e dos hefenan di Asuntunan Veterinario, despues ku a keda probá ku niun akusashon tabata bálido. No a sigui ni un prosedura legal. E mesun patronchi ta ripití den kaso di sra. Seferina di THZ i manera ta parse den e kaso resien di e direktor di sektor MNB, ku a keda nengá akseso na su trabou despues ku la ninga di partisipá na ilegalidat.

Tres fayo ta demostrá un patronchi di abusu;         

1) Akusashon fabriká, korte a desbaratá tur akusashon di “plichtsverzuim”.

2) Pretenshon falsu di ‘no apto pa funshon’. Gobièrnu no a duna ni un funshonario un oportunidat pa korekshon, lokual ta un violashon flagrante pa ehekushon di lei.

3) Uso di un solo büró eksterno ku ta haña kontrakt tras kontrakt sin e investigashonnan ta karga niun akusashon.

Tin un daño humano i profeshonal ku no por keda tapá

Funshonarionan públiko a keda humiliá públikamente, deskreditá sin base, kibrá finansieramente (gastunan di abogado te XCg. 80.000), afektá nan salú i famia, eliminá for di nan karera i pa kolmo, te awe niun di nan a keda reinstalá den nan trabou.

Riesgo pa Salubridat Públiko: un inresponsabilidat flagrante

Eliminashon di hefenan di UOVZ i THZ a i ta pone Kòrsou na riesgo real dor di falta di inspekshon di karni (kòrdá e skandalnan rondó di karni), zoonosis (enfermedat ku por pasa di bestia pa hende), higiena den bario, kòntròl di awa, kòntròl di plaga, kòntròl di mataderonan Parera i Barber. E desishonnan no ta solamente ilegal,  nan ta peligrá bida di hende!

Uso indebido di fondonan públiko, e pagadó di belasting ta paga 6 biaha pa kada abusu

Pagadó di belasting ta paga salario pa ámtenar ku no ta haña oportunidat pa traha, büró eksterno, abogado di gobièrnu, konsultant, pèrdida di servisio públiko i falta di invershon den bienestar di pueblo.

Frakshon MAN‑PIN tas enfatisá ku e abusu ta struktural. E daño ta real. E iresponsabilidat ta inkreibel.

Frakshon MAN‑PIN ta eksigí klaridat i a presentá 24 preguntanan formal na Gobièrnu, inkluso: Kuantu funshonario a keda eliminá ilegalmente? Kuantu e plaka a bai pa büro eksterno i abogado? Dikon no a reinstalá e funshonarionan? Kua medida ta tuma pa prevení abuso den futuro?