WILLEMSTAD— Siudadano E. Nicasia (45), djaluna 15 di yüni mester a presentá den sala di korte pa duna kuenta i rason pa akusashon kontra di dje. Ta trata aki di maltrato di Ramirez Prud Homme dia 25 di yanüari 2025. A ser bisá ku Nicasia a maltratá e víktima ku sla di moketa fuerte den kara i òf na garganta. Esaki a sosodé pasobra Ramirez Prud Homme a dal ku man riba e outo di Nicasia di manera ku e siudadano aki a rabia masha pisá i a disidí di golpia e persona.

Den sala di korte Nicasia a ninga redondamente ku el a dal ku moketa, sino ta solamente el a stot e víktima. E pushá tabata un hopi fuerte di manera ku e víktima a kai abou na suela i sinti due na su kurpa.

Abogado señor mr. A.K.H. Ayubi tabata esun enkargá ku e defensa di Nicasia, siendo fiskal mr. W. de Graaf a hiba palabra na nòmber di Ministerio Públiko. E wes ku a dirigí e seshon den korte tabata señora mr. Bracht.  E suseso a tuma lugá den serkania di un bar-dancing (parti pafó), pues ta na un lokalidat kaminda por a konsumí bebida alkohóliko. Riba preguntanan di wes, e akusado Nicasia a kontestá ku e no tabata fuma, pasobra e sa masha bon ku e mester kore outo despues e anochi ei mes. Sí Nicasia a rekonosé ku el a dal algun beter.

Den sala di Korte Nicasia a primintí di lo kambia su sistema pa evitá ku den futuro e bolbe hañ’é den situashonnan komparabel. Fiskal ni wes no a bai di akuerdo ku e defensa di parti di abogado mr. A.K.H. Ayubi ku e aktitut di Nicasia lo tabata pa defensa propio. En total 4 dia Nicasia a kai será pa motibu di e insidente. Fiskal a demandá un kastigu di trabou di 25 ora i ademas Nicasia mester paga un suma di 600 florin na daño i perwisio. Finalmente wes a yega na un kastigu di trabou di 25 ora totalmente kondishonal, deskitando por parti pa e hecho ku Nicasia a pasa 4 dia den prizòn.