Alerta na yunan di Kòrsou na Houston

WILLEMSTAD— Ta falta apénas un dia, òf algun ora pa Kòrsou, komo e pais di mas chikitu den historia pa partisipá den Kopa Mundial di futbòl. Manera ta ampliamente konosé, Kòrsou no ta solamente e pais di mas chikitu pa loke ta trata teritorio pero tambe na kantidat di abitante, pa partisipá den Kopa Mundial. Sinembargo tin puntonan di alerta importante ku mester tene kuenta kuné. Den último oranan Clarity Media a tuma nota di anunsio dirigí na tur yu di Kòrsou ku ta na Houston, Texas pa asistí na e wega di djadumingu 14 di yüni den kua Kòrsou ta enfrentá Alemania.

Tin indikashon ku djadumingu 14 di yüni lo tin un protesta na NRG Stadium na Houston, durante di e partido entre Kòrsou i Alemania. Ta trata di un protesta organisá pa Project World Cup Spotlight. E protesta ta plania pa kuminsá 10’or di mainta te 6’or atardi. E tema ta “Put ICE on the Global Stage”. E titulo ta mustra bon kla ku esnan tras di e protesta ke probechá e echo ku mundu tin atenshon pa Kopa Mundial pa ekspone kasonan kaminda ta trapa derechonan humano, i e manera ku ICE (Immigration and Customs Enforcement). E protesta opviamente ta kontra di e polítika di imigrashon di Merka.

Manera indiká ariba, lo tin hopi fanátikonan yu di Kòrsou na e stadion i nan lo topa ku e protesta aki ku ta tuma lugá rondó di e stadion. Polis di Houston ta informá ku lo tin presensia polisial fuerte rondó di e stadion. Ademas lo tin polis riba kabai pa yuda garantisá seguridat di tur esnan ku ta asistí na e stadion pa wak e wega. For di FBI ta Sali informashon na tur pais pa informá nan fanátikonan pa tene kuenta ku “spoofing & phishing”. Kriminalnan sibernétiko ta yama bu i ta trata na pasa komo servisio di impuesto, banko òf otro instansia i asina ta trata na laga e persona manda sen i tambe haña akseso na datonan personal ku nan por usa den nan aktonan kriminal.

Rekomendashon na tur yu di Kòrsou na Merka pa tene bon kuenta ku moveshonnan riba kaya, i na mes momentu paga tinu ku websitenan ku por parse legítimo, pero ta trampa pa gara hende. Pagatinu bon pa klek linknan sin mas. Outoridatnan merikano ta duna komo ehèmpel e website di FIFA.com ta e website ofisial, pero tin tambe FIFA.org i hopi otro kombinashon mas i tur ta fake.