KÒRSOU KAMPEON MUNDIAL DI LITTLE LEAGUE 2026

Resultado final – wega 38: Kòrsou 11 – Mountain 2

WILLIAMSPORT/WILLEMSTAD— Kòrsou a bini bèk den di tres inning i despues kabes pariba te final. Ku un viktoria konvinsente di 11-2, e ekipo di Kòrsou a titulá kampion di Little League Baseball World Series 2026. Pabien na kada un di e streanan chikí, nos muchanan, coachnan, mayornan i tur ku a duna nan sosten. Pabien Kòrsou.

E 12 ponchenan di e picher Jaymiëll Martina a yuda Kòrsou eliminá Hapon djasabra. Jaymiëll Martina a saka 12 batidó ku ponche i tambe a bati un dòbel ku a hinka un kareda. Asina Kòrsou a derotá Hapon 4-0 i a klasifiká pa e final di Little League Baseball World Series pa di seis biaha den historia di nos pais.

Despues di e wega, Martina tabata sintá den sala di prensa di Lamade Stadium ku eis rònt di su skouder drechi i un sèrbètè riba su skouder. Su labor komo picher den e torneo tabata kasi kla. Segun reglanan di Little League, Martina no por subi riba montikulo atrobe despues di a tira 86 bala den e último wega internashonal di Kòrsou. Martina a tira 5⅔ inning sin permití ningun kareda. El a permití solamente dos hit i dos base por bola. Ku dos out den parti ariba dje di seis inning, el a baha for di montikulo bou di un ovashon di públiko. Hasta e fanátikonan di Hapon, ku tabata sintá na e banda di tersera base, a aplaudí’é.

“Esaki ta algu hopi grandi pa pueblo di Kòrsou i tambe pa e muchanan aki,” asina manager di Kòrsou, Railison Gijsbertha, a bisa. “Nos a bini aki sabiendo ku Kòrsou tin un historia den beisbòl i ku tin un historia entre Hapon i Kòrsou. Nos ta hopi kontentu ku loke nos a logra.” Manager di Hapon, Masanori Takeda, a elogiá su hungadónan. “E hungadónan a hasi nan trabou masha bon. Nos a pèrdè e promé wega, pero nos a sigui lucha i nunka nos a entrega. Esei ta loke ta hasi e ekipo aki spesial.”

Giendry Ryan, kende huntu ku Martina a logra un wega sin hit kontra Hapon den e di dos buèlta di e torneo, a registrá e último out.

Tres otro hungadó di Kòrsou tambe a logra un hit. Den kuater wega na Williamsport, e ekipo di Willemstad a hinka 23 kareda i a permití solamente tres. Tabata pa di tres biaha den sinku aña ku un ekipo di Willemstad a kompetí kontra un ekipo merikano pa e título di Little League na Lamade Stadium.

E wega kontra Hapon no a kuminsá fásil. Hapon tabata determiná pa tuma revancha despues di su derota di 6-0 kontra Kòrsou. Ku nan promé dos turno na bate, e batidónan hapones a manda dos hit fuerte den outfield.

Ku solamente un out, Hapon a yena tur base. Martina a hala rosea profundo i manager Gijsbertha a bishit’é riba montikulo. E entrenadó di Kòrsou a disidí laga su picher estelar sigui den wega. Martina a saka e siguiente dos batidó ku ponche i a laga tur tres koredó riba base.

“Mi a kuminsá skucha e coach. Mi tabata tira diferente tipo di bala. Ora mi a kuminsá skucha, mi a kuminsá tira bon,” Martina a bisa. Despues di esei, Hapon no a bolbe forma un menasa serio. Martina a kombiná su fastball ku curveball i slider, pa deleite di kasi 22.000 fanátiko ku a yena e stadion i e seru tras di outfield. “Martina ta un picher super bon. E tin un bon fastball, curveball i slider. Nos no por bisa mas ku esei,” Takeda a deklará. Atake di Kòrsou a habri e wega den parti abou di tres inning. Un serie di toke, kombiná ku kuater eror di tiru di Hapon, a duna Kòrsou un bentaha di 3-0. “Pasobra e skor tabata abou i nos tabata sa ku Hapon ta un ekipo difísil, ora nos a mira ku nan no por a hasi out riba e tokenan, nos a sigui dal toke,” Gijsbertha a splika.

Un inning despues, Kòrsou a agregá un di kuater kareda. Martina a bati un dòbel profundo entre left field i center field, ku a permití Ryan drenta kas. “Pueblo na Kòrsou ta masha kontentu ku nos a yega asina leu,” Gijsbertha a bisa. “Nos no a yega tan leu ku nos tabata ke den Kopa Mundial, pero awor nos a logra. Nos ta sigui kore ku e ola blou.”

E ola blou a hiba Kòrsou te na e título: kampeon di Little League Baseball World Series 2026!