Aqualectra: Pronóstiko ta mustra faborabel

WILLEMSTADS— Kondishonnan di bientu na e momentunan akí ta mustra ku e parkenan di mulina di bientu lo por generá di forma stabil den e dianan benidero i yuda karga ku e demanda di koriente pa komunidat, asina Aqualectra ta informá.

1 di e 4 mashinnan ku tabata for di servisio entretantu ta produsiendo. E kapasidat èkstra ei tambe ta disponibel awor. Ke men, na e momentunan aki e kompania no ta antisipá ku ta bai ta nesesario pa ‘schakel’ den e dianan benidero. Ku 3 di e mashinnan for di servisio te ainda, e produkshon ta hopi dependiente di energia renovabel pa por brinda komunidat e servisio meresí.

Fuentenan di energia renovabel manera bientu i solo, semper por kambia di un momentu pa otro. Pues ta keda monitor e kondishonnan di bientu i e disponibilidat di e mashinnan i bateria di almasenahe konstantemente miéntras ku ta trahando pa por drecha e mashinnan i hiba Kòrsou bèk na stabilidat.

Aqualectra un bia mas ta yama danki pa karga ku e situashon miéntras ku nan ta keda traha pa por sirbi komunidat kada bia mihó. Danki tambe, pa duna oido i yuda mantené e demanda di koriente stabil i usa koriente di forma responsabel durante e dianan akí pa huntu por kaba di pasa dor di e periodo. Si akaso tin kualke desaroyo, lo sòru pa tene komunidat informá via di Aqualectra su medionan sosial.