Sertifikado na 4 kursista di evaluashon musikal

WILLEMSTAD— Siman pasa a tuma lugá entrega di sertifikado na 4 kursista ku a sigui e kurso di Evaluashon musikal.  E kurso aki tabata bou di direkshon di Sr. Rignal Yankey huntu ku sosten di dos dosente kapasitá i outorisá den kanto ku ta Sr. Dennis Aalse i Dr. Francis de Lanoy.

E kurso ta konsistí di materianan práktiko i teóriko, repartí den un unidat di 10 lès. Kada lès tin un durashon di un ora i mei (1½). 

E parti di  Materianan práktiko tabata konsistí di:

Ehersisio di relahamentu (postura)                      

Respirashon; uso di diafragma

Artikulashon; vokalisashon

Entonashon; uso di stemvork i handzingen

Fraseo musikal, sonoridat, intensidat, registro di bos

Dinámika, ritmo, tèmpo , timbre di bos

Práktika di kanta i su aspektonan

E parti di materianan teóriko tabata konsistí di:

Pèntagram, nòmbernan di nota, balornan di nota i sòlfeo

Direkshon di palunan di nota, rùst/pousa musikal

Duna mat i direkshon koral, kompas, yabinan musikal, intervalonan

Ta bon pa pone aserka ku Sr. Rignald Yankee , despues di 56 aña sin interupshon ku a fungi komo dosente di músika i dirigente di kor, a disidí di kompartí su eksperensia i duna formashon na koristanan, kantantenan, kornan i dirigente di kor. Tur esaki e ta hasi di un manera kompletamente boluntario.  Manera indiká, el a haña sosten di Dr. Francis de Lanoy i Sr. Dennis Aalse.

Riba e potrètnan por mira dos partisipante ku ta haña nan sertifikado. Dos otro partisipante ku tambe a pasa e kurso ku éksito a opta pa no bai den publisidat. Tur e tres dosentenan ta mira bèk riba un aktividat eksitoso i ta sumamente kontentu ku e partisipantenan a haña profundidat di loke nan ta hasiendo.

Tantu Rignald Yankee, Francis de Lanoy i Dennis Aalse nan deseo  ta pa hiba e nivel di kanto i músika di kor na un nivel haltu. Pa mas informashon por tuma kontakto ku Sr. Rignald Yankee na telefòn 560 5790