BLUE WAVE TA INSPIRÁ SELEBRASHON DI 25 AÑA DI RAC

WILLEMSTAD –Komo parti di su selebrashon di 25 aña, ku ta marka un kuart siglo di regulashon independiente i imparsial na Kòrsou, Regulatory Authority of Curaçao (RAC) a risibí ku hopi orguyo, miembronan di e selekshon nashonal di futbòl di Kòrsou, nos Blue Wave, pa un enkuentro speshal ku empleadonan di RAC.

E bishita aki a reuní dos organisashon ku ta kompartí e mesun kompromiso ku ekselensia, dedikashon i servisio na komunidat. Empleadonan a haña e oportunidat úniko pa topa ku e héroenan ku ta sigui inspirá e nashon aki dor di nan trayekto ekstraordinario riba e esenario internashonal.

Durante di e evento, CEO di RAC, Curt Belfor a ekspresá su gratitut profundo na e hungadónan i e kuerpo tékniko, rekonosé nan papel komo embahadornan di Kòrsou i símbolonan di orguyo nashonal.

‘Boso, nos Blue Wave ta representá e speransa i aspirashonnan di henter nos nashon,” e CEO a bisa. ‘Nos ta sinti nos mes honrá pa selebrá awe huntu ku boso ku ta karga nos bandera ku orguyo riba e esenario mundial. Na nòmber di RAC, nos ta deseá boso tur klase di éksito den e buskeda kontinuo pa avansá na FIFA World Cup i den boso mishon pa inspirá generashonnan di futuro di yu di Kòrsou.”

Miéntras ku RAC ta reflehá riba 25 aña di sirbi Kòrsou pa medio di regulashon hustu, transparente i independiente, RAC ta uni ku komunidat den sostené e soño ku a bira realidat di The Blue Wave pa kompetí riba e tarima mas grandi di futbòl mundial.