Na Aruba: Polis a ‘pone sla’ pa baho mundu

ORANJESTAD – Outoridatnan ta den un racha serio di atake riba krímen organisá i mundu kriminal. Bosero polisial di Aruba ta informá ku durante fin di siman tras di lomba polisnan a tene akshonnan ku a resultá hopi eksitoso.

E departamento di Krímen Organisá (UGC) a dal baho mundu duru un bia mas. Na altura di Rodgers Beach a hasi detenshon i a konfiská hopi bultu di droga. A detené un total di 6 persona: 5 ta hende hòmber nase na Aruba i 1 hende muhé nase na Colombia.

Tabata un akshon bon kordiná pa personal di UGC ku despues di un investigashon rápido a ‘pone sla’ pa baho mundu. A konfiská basta bulto di droga i tambe a konfiská un outo i dos jetski.

E investigashon no a keda einan pero a sigui. Den oranan di anochi a hasi dos entrada hudisial simultáneamente. Un na un kas na Seroe Colorado i e otro na un kas na Appelsinastraat. Na e kas na Appelsinastraat a detené un hòmber pa poseshon i bendementu di droga.

Djasabra mainta a sigui ku e investigashon na kosta i a bin topa ku mas bulto di droga. Den e akshon aki Kustwacht a yuda tantu riba laman komo na tera. E investigashon ta den pleno desaroyo i no ta deskartá ku lo tin mas detenshon.

Kuerpo Polisial Aruba ta hasi un apelashon na esun ku sa algu òf a wak algu pa yama e tiplijn di polis ku ta 11141. Bo ta keda anónimo.