2 dama e fayesé den aksidente di tráfiko

WILLEMSTAD— Dos hende muhé a pèrdè nan bida den un aksidente di tráfiko. Den e mardugá di djabièrnè pa habri djasabra 29 di ougùstùs, sentral di polis a haña notifikashon banda di 03:39 di un aksidente grave ku a kaba di tuma lugá. E kaso a tuma lugá riba e krusada Dominico “Don” Martina Boulevard i Schottegatweg-Zuid. Na yegada di e promé unidat, a topa dos vehíkulo, ámbos outo di famia, den kua un di nan tabatin dos dama i den e otro tres okupante. E dos damanan tabata seriamente heridá i nan situashon tabata krítiko. Personal di ambulans ku a yega na e sitio, a indiká ku ningun di dos tabata duna señal di bida. Dòkter di polis ku tambe a presentá despues, a konstatá morto di Sharisemary Rosalia Hous, nasé na Kòrsou 4 di sèptèmber 1985 i Zaira A. Nepomuceno-Martis, nasé na Kòrsou 7 di desèmber 1961. For di investigashon preliminar a sali na kla, ku kousa di e aksidente ta probablemente debí na falta di dunamentu di preferensia. Personal di Departamentu di Tráfiko ta kontinuá ku e investigashon.

Forsa na famia di e defuntunan.