Wardakosta mester a duna asistensia na turista riba Seru Kristof

WILLEMSTAD—Un bia mas Wardakosta su Sentro di Operashonnan Marítimo (MOC) via di Kuerpo Polisial Kòrsou a risibí petishon djaluna 6 yüli, pa duna asistensia na un hòmber ku ta riba Christoffelberg. E hòmber, un turista Hulandes di 74 aña, tabata kanando i a kai lastimá su mes. Komo resultado di e kaida, e hòmber a sufri un leshon na su kabes, kual a pone ku e no por a sigui kana independientemente. Brantwer, Politur, Park Rangers i tambe ambulans tabata presente na e sitio, pero no a logra yega na e hòmber komo ku e tabata kasi na e tòp di e seru. Despues di risibí e notifikashon, MOC a desplegá e helikòpter di Wardakosta pa duna asistensia na e turista riba Christoffelberg. E helikòpter a bai na e sitio pa hisa e hòmber i hib’é na e punto di sosten di Wardakosta na HATO, kaminda un ambulans tabata warda pa hib’é hospital pa e por haña asistensia médiko.