Despues di akshon drástiko kontra kriminalidat, awor atenshon pa enseñansa
1
Vishon i determinashon pa logra kosnan konkreto pa un pueblo
SAN SALVADOR – Konstrukshon di un kaya prinsipal ku mester aliviá muchanan pa bai skol a bira un proyekto hopi mas grandi na El Salvador. No solamente a amplia e kantidat di kilometer pa yega te Guatemala, pero a konstruí skol ku tur fasilidat pa mucha i hóbennan.
Mas i mas no ta tuma nota di kambionan signifikativo ku ta tumando lugá na El Salvador bou di mando di e presidente Najib Bukele. Despues di tuma akshon drástiko pa loke ta trata seguridat den e pais, atakando kriminalidat realmente ku man duru, awor e konsentrashon ta hopi riba enseñansa. Ya kaba kompanianan manera Google a establesé partinan importante na e pais di sentro Amérika. No por keda sin menshoná ku organisashonnan internashonal tin problema pa e echo ku lo ta trapa derecho humano di kriminalnan.
Manera indiká ariba e intenshon di e presidente tabata pa traha un kaya pa konektá dos siudat ku un distansia di 8 kam. Ora ku e trabounan a kuminsá e pueblonan a pidi pa amplia e kaya i yega mas leu. Na lugá di 8 kam a amplia e konstrukshon te 12 kam. Esei lógikamente a nifiká mas gastu pa e gobièrnu, pero e benefisio ta ku e kaya ta yuda i fasilitá muchu mas tantu hende.
A sigui amplia ku 3 kam mas te yega pais bisiña Guatemala. Presidente Bukele a bisa ku ta di spera ku Guatemala lo probechá i traha un kaya pa yega El Salvador i asina ta fortalesé e konekshon. E ta nifiká mas invershon, mas kupo di trabou, turismo, mas botika, supermerkado, pòmp di gasolin i hopi mas. E área enkuestion ta unu di plantashon pues un mihó kaya ta pone ku e produkshon agríkola ta yega su destino muchu mas fásil.
Trahadó e kaya e presidente a disidí ku ta traha skol tambe. Den un aña e skol tambe ta kla. Ta trata di un skol bon ekipá. Promé dama tambe ta hasi máksimo esfuerso pa muchanan chikitu por haña e mihó edukashon.
Bukele a anunsiá ku masha orguyo e loke e rapòrt PISA ta indiká di kalidat di edukashon di El Salvador. Finalmente e presidente a splika tur mayor, mucha chikí i hóben ku gobièrnu i tur hende ta hasi tur esfuerso pa nan por siña i prepará nan futuro pero e úniko kos ku falta ta esfuerso, determinashon di kada mucha i kada hóben.
