Update: FLOW a mèldu RAC ku nan tin problema for di mainta

WILLEMSTAD– E kompania FLOW a konfrontá problema serio e.o debí na kabel di fiber ku a kima. Esei ta parti di loke nan a informá na Regulatory Authority Curaçao (RAC), asina Curt Belfor CEO di e entidat a deklará na Clarity. Manera a keda informá den kurso di djabièrnè atardi, vários área di Kòrsou a konfrontá problema ku Internèt hinter dia. A bin resultá ku FLOW a kumpli ku regla i a informá RAC di nan situashon. Lamentabel ta ku komunidat ku ta e kliente prinsipal mes a haña informashon via via te den kurso di mèrdia pa atardi.

Sr. Belfor a duna di konosé ku FLOW a mèldu 09:38 am ku nan tin problema, esta interupshon di Internèt. Tambe nan a informá kua ta e áreanan ku lo tin problema. E promé informe a papia di ‘burned fiber cable’. Nan a informá tambe ku ta bai tuma tempu promé ku restablesé e situashon. Pues nada straño ku durante di hopi ora komunidat a keda sin konekshon di Internèt adekuá.

Belfor a splika mas aleu ku RAC ta laga e kompania restablesé e servisio i despues ta bai investigá kiko a pasa presis i kon e kompania a atendé ku e problema. Pa loke ta trata e echo ku ta den oranan di atardi por a haña informashon kiko ta pasando, e direktor di RAC a indiká ku ta bon pa nan atendé ku FLOW pa informá komunidat esta klientenan na un manera mas debido, pasobra si e klientenan sa ku tin un situashon nan por rabia, pero sikiera por tene kuenta i hasi otro areglo.

Kòrsou un bia mas ku interupshon serio di Internèt

WILLEMSTAD— Un bia mas Kòrsou ta konfrontando un situashon hopi serio ku falta di komunikashon di Internèt. Meskos ku den mayoria sosiedat na mundu, aki na Kòrsou tambe Internèt ta mes òf asta mas importante ku koriente. Awendia práktikamente tur kos ta drai ku òf rondó di Internèt i p’esei ku e ta algu asina nesesario. Clarity tambe ta buskando pa haña kontakto ku e kompanianan pa tende kiko ta pasando.

Esakinan ta un lista di áreanan ku a keda afektá, segun e kompania FLOW: – Bapor Kibra- Biesheuvel- Bivak- Bottelier- Brievengat- Buena Vista- Comfortabel- Damacor- Dein- Dominguito- Emmastad- Esperansa- Fortuna Abou- Francia- Groot Kwartier- Groot Piscadera- Jongbloed- Juan Hato- Kanga- Koraal Specht- Kunuku Abou- Mahaai- Mahuma- Matancia- Mon Repos- Monte Carmelo- Muizenberg- Nooit Gedacht- Rancho- Rio Canario- Rooi Catochi- Rooi Indjan- Salina- Schelpwijk- Suffisant- Sun Valley- Sunset Heights- Trai Seru- Welatina