Último oportunidat pa entrega bo arma ilegal na OM

WILLEMSTAD – Djabièrnè awor, esta mayan 10 di aprel ta e último dia di e kampaña konhunto di Ministerio Públiko i Kuerpo Polisial di Kòrsou, bou di e lema “Entrega bo arma i skapa un alma.” Bosero di Ministerio Públiko(OM), Roderick Gouverneur ta splika ku Te na e momentu aki, siudadanonan por hasi uso di e areglo. Sinembargo, esaki ta e último chèns pa entrega un arma di kandela sin konsekuensia penal. Despues di 10 di aprel, lo apliká un maneho estrikto: kualke arma di kandela ilegal ku hañá lo kondusí na persekushon penal inmediato.

Esaki ta e último chèns pa entrega un arma di kandela sin konsekuensia penal. Despues di 10 di aprel, lo apliká un maneho estrikto: kualke arma di kandela ilegal ku hañá lo kondusí na persekushon penal inmediato. Ademas, den kasonan asina, Ministerio Públiko lo eksigí un oumento di kastigu signifikante durante tratamentunan den korte.

E kampaña, ku a kuminsá djaluna 16 di mart, tin komo meta pa redusí violensia ku arma i promové barionan seif i liber di arma. Resultadonan inisial ta mustra ku e mensahe ta yegando na komunidat: te ku awor, a entregá 31 arma di kandela boluntariamente.

Ainda tin chèns pa entrega arma ilegal na OM, edifisio De Tempel entre 08:00 i 15:00. Esnan ku entrega un arma ilegal ta risibí un rekompensa monetario komo un insentivo, dependiendo di e tipo i kondishon di e arma, ku ta varia entre XCG 300 i XCG 750.