Siudadonan gará ku arma di kandela riba kamindanan públiko.

Pa kuminsá e siudadano di fam Nicolaas, kende tin 26 aña di edat, a keda gará ku 1 pistol di e marka FEG, modelo Mark II AP, kaliber .380 outomátiko i e munishon korespondiente. E pistol ariba menshoná, segun polisnan, tabata kargá ku 4 patronchi. E violashon di arma di kandela akí a sali na kla na momento ku un patruya di polis, koriendo den outo riba kaminda públiko, patras di un otro vehíkulo, a mira un persona, komportando hopi straño, kende na sierto momento hasta a saka man pafó di e vehíkulo i benta un opheto koló skur riba suela pafó di e vehíkulo. Tambe un tas koló blanku (1 tas pa skouder), Nicolaas lo mester a purba deshasí di dje. Wes señora mr. van Rijssen durante tratamentu di e kaso akí a splika ku polisnan a añadí un prosèsverbal mas den kua ta duna un deskripshon muchu mas amplio i eksakto di loke a sosodé. Parse ku e outo di polis, koriendo patras di e vehíkulo den kua e akusado Nicolaas tabata sintá, tabata kada biaha bastante serka di e outo di Nicolaas, variando di e distansia di entre 3 pa 5 meter. E suseso aki a tuma lugá dia 13 di desèmber 2025 i e patruya di polis mesora a bai mira na e sitio kaminda Nicolaas lo mester a benta e opheto skur pafó di e outo, pa konstatá ku ta trata aki di un pistol bon kargá. Pero, e akusado Nicolaas for di e dia ku polisnan …

Un siguiente kaso di violashon di e lei di arma di kandela tratá djabièrnè 20 di mart 2026, den sala di korte ta referí na e siudadano di fam Geertruida, kende tin 32 aña di edat. Ta un persona ku ta bibando na Ulanda, pero ku a bin Kòrsou prinsipalmente pa presensiá e fiesta grandi ku a tuma lugá serka di aeropuerto Hato den luna di desèmber. Na e fiesta akí Geertruida a bin reis riba un persona ku den pasado a yega di tira riba dje ku arma di kandela. Pa motibu di e konflikto akí Geertruida a disidí di buska un arma di kandela e tambe, pero polisnan durante un kòntròl di tráfiko a haña Geertruida ku e arma di kandela dia 13 di desèmber 2025. Ta trata akí di 1 revòlver marka Smith & Wesson kaliber .38, spesial di e seri 51776 ku su munishon korespondiente, ku el a kumpra serka un ‘chamo’ (dominikano). E revòlver akí tabata kargá ku 5 patronchi.

Geertruida a splika ku aktualmente e ta biba na Ulanda, kaminda su famia ta, esta yu ku señora, kendenan ta dependé di dje. Abogado enkargá ku e defensa di Geertruida, esta mr. Ulrich Dickens, mesora a pidi palabra pa konsentrá atenshon full riba e sirkunstansia pésimo di su kliente den sèl aya na prizon di Koraal Specht. Señor Geertruida, segun su abogado ta sufri di ‘klusterhoofdpijn’ ku ta un malesa ku e sirkunstansia den prizon na Koraal Specht no ta tene kuenta kuné. En prinsipio lo mester tabatin un tanki di oksígeno instalá den su sèl por si akaso e malesa aki lanta kabes, pero esaki no ta posibel di akuerdo ku e preskripshonnan di kuerpo di bombero. Ademas a resultá ku ni sikiera tin un intercom instalá den e sèl pa kaso di emergensia ku por presentá, kaminda mesora por tuma kontakto ku dòkter. Hopi lihé mester a saka e konklushon ku no por hasi masha na e situashon di Geertruida ku su malesa den prizon.

Fiskal señora mr. K. Hara a para ampliamente ketu na e sirkunstansia di Geertruida, refiriendo na su bon komportashon prinsipalmente durante e proseso hudisial andando. E fiskal a puntra Geertruida kiko ta bai sosodé despues ku su periodo di enkarselashon ta tras di lomba i ku lo e mester regresá Ulanda pa sigui ku su bida. E akusado Geertruida a kontestá ku e insidente akí definitivamente ta pasado, e ta un kapítulo será. Abogado mr. Dickens a pidi pa wes, tene kuenta ku e kliente aki su situashon, pa kondená su kliente na e kastigu igual ku e periodo ku el a sinta kaba den prizon. Pero wes a mustra ku e sirkunstansia defisiente ku Geertruida ta pasando aden ta puramente komo konsekuensia di e akto kastigabel ku e mes a kometé. Wes a haña ta nesesario tene un pousa di algun minüt promé ku dikta sentensia.

Wes señora mr. van Rijssen, teniendo kuenta ku e situashon di Geertruida enbèrdat a moderá e kastigu un poko kompará ku e demanda original di 18 luna kastigu di prizon di kua 8 luna kondishonal. Wes a kondená Geertruida na e kastigu di 18 luna di prizon di kua 10 luna kondishonal, mará na un periodo di prueba di 3 aña. Geertruida i su abogado tin 2 siman pa disidí si ta bai den apelashon kontra di e sentensia.