Curoil: gastunan ta subi manera spantoso

WILLEMSTAD – Gastunan den sektor marítimo, ta subi di un manera spantoso. Na palabra Yamil Lasten direktor di Curoil durante konferensia di prensa di gobièrnu. E desaroyo aki ta pone ku Curoil mester ta muchu mas skèrpi den su maneho i operashon pa skapa oumentunan hopi drástiko.

Resientemente a sali un publikashon den medionan di komunikashon indikando subida drástiko di tarifanan pa karga marítimo. E direktor di Curoil a mustra ademas ku tarifa di flete ta subi meskos “demurrage”, esei ta e kosto ku kompanianan di karga marítimo ta kobra den kaso ku kònteiner dura mas tantu tempu serka e komersiante pa baha e karga. E gastu di “demurrage” manera sr. Lasten a indiká, tabata 18.000 dòler pero awor e ta bai bira 100.000 dòler. Ta un oumentu spantoso ku ta nifiká oumentu drástiko di e produktonan importá.  

Tur esaki ta nifiká ku Curoil mester bira mas skèrpi, pa evitá oumentu di gastu. E barku ku Curoil a atkerí algun tempu pasá, Frontera, ta   pa hasi negoshi internashonal. E operashon internashonal hustamente mester yuda Curoil karga e efektonan di desaroyonan lokal.  

Banda di esei tin tambe airopuerto, kaminda jetfuel pa avionnan tambe ta bira mas karu. Na opinion di Lasten, e impakto tei pero komo Curoil nan ta hasi e esfuerso pa manehá esaki pa sigui karga e operashon.